Nov team – nova schanza. Il respect è bain grond, il plaschair dentant anc bler pli grond. L’equipa da dunnas Nexetis ch’è vegnida lantschada il november da Swiss Cycling, quai per promover e dar ina schanza a giuvnas ciclistas, stat avant sia premiera al Tour de Suisse che cumenza ils 12-06 a Gstaad e va a fin ils 15-06 a Küssnacht am Rigi. Per quest ensemble da la managera da team Anna Wiese ed il schef da sport Edi Telser sa tracti da l’emprima preschientscha ad ina cursa da la World Tour.
Ginia Caluori – ina da las pitgas en il Team Nexetis
Il team svizzer Nexetis parta al Tour de Suisse Women che festivescha quest onn il pitschen giubileum da 5 onns, cun sis atletas, trais èn Grischunas. Dasper Anina Hutter da Trimmis e la rumantscha Larissa Tschenett er anc Ginia Caluori da Panaduz. La spezialista da mountainbike è gia sa participada trais giadas al Tour de Romandie. Tar ses emprim Tour de Suisse vala la giuvna da 22 onns sco la gronda speranza en quest giuven team Nexetis. Ella lessi empruvar insatge, cunzunt tar l’emprima etappa che maina tranter auter sur il pass Jaun che collia il chantun Friburg cun la Part Sura Bernaisa. Quai saja ina etappa che giaschia bain ad ella che vala sco spezialista da muntogna, di Ginia Caluori.
La crème de la crème a la partenza
En emprima lingia vali per Ginia Caluori sco er per l’entir team da Nexetis da rimnar experientscha. Cunzunt quai che pertutga la tactica pon las giuvnas emprender bler en questa cursa cun las meglras ciclistas dal mund. Las grondas favuritas èn cunzunt la Neerlandaisa Demi Vollering ch’ha gudagnà l’onn passà, la Polonaisa Katarzyna Niewiadoma ch’ha triumfà il 2024 al Tour de France sco er la Svizra Marlen Reusser. Er a la partenza è Elena Hartmann oriunda da Domat che parta per in’equipa tudestga.
