Avant 25 onns ha cumanzà il «Trimmiser Cup» sco pitschen turnier da la generaziun giuvna da karate a Trimmis. Dapi lura è creschi il turnier dad onn ad onn, uschia ch'ils organisaturs han stuì spustar il turnier a Cuira en ina pli gronda halla. Quest onn èn stads da la partida 460 karatekas, il num per cumbattantas e cumbattants da karate. Ed entant è il cup daventà enconuschent sin l'entir mund. Uschia èn quest onn era stads da la partida inqual stars da la scena da karate, tanter auter in dals pli auts en il stil da Kyokushinkan – Kaicho Hatsuo Royama.
Karate cun cumplain contact
Kyokushinkan karate è la furma da karate cun plain contact. En questa disciplina na vai dentant betg mo per il cumbat. En il center stattan la precisiun, la disciplina, la controlla da corp e la perseveranza. Uschia na mettan ils organisaturs betg mo pais sin il turnier, mabain fan era seminaris da Kyokushinkan.
Ils proxims onns vul l'organisatur dal «Trimmiser Cup» Yves Mathis far in campiunadi europeic a Cuira. Quai daventass lura dentant ina sfida anc pli gronda per l'organisaziun. Cun anc dapli annunzias stuess ins forsa far in di be per ils juniors, ed in ulteriur di per l'elita.
