Per Belinda Bencic è l’US Open a fin suenter la terza runda. La Svizra ha pers cunter la Tscheca Karolina Pliskova en trais sets cun 7:5, 4:6 e 3:6. La partida ha cuzzà duas uras e mesa. Suenter ch’era la campiunessa olimpica è out, na fan naginas Svizras e Svizzers pli part da l’ultim turnier da Grand Slam da l’onn.
Karolina Pliskova frunta en l'otgavelfinal sin Victoria Azarenka dal Belarus.
La terza runda
Belinda Bencic è en la terza runda da l'US Open. Cunter la Rumena Sorana Cirstea ha la giugadra da tennis svizra gudagnà cun 3:6, 7:5 e 6:2. Bencic ha nizzegià la segunda balla da matsch. En la terza runda la sonda frunta Belinda Bencic uschia sin Karolina Pliskova da la Tschechia.
La segunda runda
Durant la notg da mardi sin mesemna ha Belinda Bencic battì la Tudestga Andrea Petkovic cun 6:2, 4:6 e 6:4. Per Petkovic era quai l'ultim matsch da sia carriera. Bencic gioga sia proxima partida gievgia encunter la Rumena Sorana Cirstea. Ella è il dumber 37 dal mund.
Marc-Andera Hüsler perda suenter in lung cumbat e bunas schanzas da gudagnar cunter il dumber 21 dal mund Denis Shapovalov cun 6:2, 4:6, 4:6, 6:3 e 1:6.
Stan Wawrinka aveva in di avant stuì dar si en l'emprima runda cunter il Franzos Corontin Mouté – quai tar in stan da 4:6 e 6:7. Cunter la fin dal segund set ha Wawrinka pliras giadas tutgà sia coissa. Ses fisioterapeut ha pliras giadas stuì tractar el sin la plazza.
Alexander Ritschard ha pers cunter Félix Osche-Aliasim dal Canada cun 3:6, 4:6, 6:3 e 3:6. Il gieu ha cuzzà passa trais uras.
E la Svizra Jil Teichmann perda cunter la Chinaisa Shaui Zhang cun 4:6 e 2:6. Per ella èsi gia la terza giada ch'ella croda or gia en l'emprima runda d'in grond turnier da tennis.
