Ina surpraisa n'èsi betg che Christian Wohlwend sto far la valischa tar il HCD. Las ultimas emnas èsi vegnì speculà savens en las medias che la èra Wohlwend tar Tavau pudess prender suenter strusch quatter onns ina fin. Mo è la relaschada giustifitgada? Sch’ins guarda mo sin ils resultats, lura betg. Suenter l'èra Del Curto, ha Christian Wohlwend stabilisà l'equipa e professiunalisà las structuras dal HCD. Cler, cumbattì per il titel n'ha Tavau betg ils davos onns. Ils Grischuns èn dentant adina stads in'equipa fitg solida e l'onn passà per exempel, dumagnà fin il mezfinal dals playoffs.
I n'ha betg giaschì vi dals resultats
Mo ils resultats n'èn probablamain er betg stads il motiv per la relaschada. La relaziun cun ils giugaders ha probablamain era giugà ina rolla.
Christian Wohlwend n'era betg gist il pli popular tar inqual giugader.
Ed er il schef da sport Jan Alston n'è mai stà in grond fan dad el. E sch’i na constat betg en cabina, èsi grev per in trenader. Vitiers ha el er vilentà ils responsabels cun ses depurtament magari nuncontrollà e memia emoziunal.
L'avrigl 2019 cura ch'el è vegnì elegì sco nov trenader, han ils responsabels dal club ditg ch'els beneventian in trenader d'emoziuns. Ils ultims onns èsi magari dentant stà da memia. En intervistas parava Wohlwend magari in zic nunponderà e sur-emoziunal. E la bittada da la buttiglia sin il glatsch en il mezfinal dals playoffs encunter Zug l’onn passà è stà il punct sin l’i da sia cumparsa nuncontrollada. Uschia è la relaschada dal trenader Engiadinais, baud u tard, stada da spetgar.
Gian Carlo Candinas
Redactur RTR
