Durant che Nino Schurter sa participescha quest onn gia per la novavla giada al Cape Epic, la cursa d’etappas en l’Africa dal Sid che vala sco la pli dira e pretensiusa cursa da mountainbike insumma, sa focussescha la gronda part da ses concurrents sin la cuppa mundiala da cross-country che cumenza mez avrigl en la Brasilia.
Nino Schurter è in da paucs ch’è suenter il Cape Epic savens en ina meglra furma ch’avant. Per il Lumnezian è questa cursa onn per onn in bun trenament. Per la gronda part fiss quai dentant memia bler, e perquai desistan els da quella cursa d'etappas giudim l'Africa. Blers profis ch’èn sa participads ils davos onns al Cape Epic han silsuenter duvrà bler temp da sa revegnir e la finala er gì ina mala stagiun da cross-country.
Il ristg che quai experiment cun il Cape Epic na funcziunescha betg è per nus memia grond, perquai mettain nus il focus sin la cuppa mundiala.
Uschia desista er Vital Albin dal Cape Epic. Sia finamira èn las cursas da la cuppa mundiala nua ch’el vul sa classar quest onn regularmain sut ils top 10. Il ristg saja er per el memia grond da crudar en ina rusna suenter ina tala cursa extrema sco il Cape Epic sur otg etappas cun per part fin 100 kilometers e fin 3’000 meters differenza d’autezza al di. Mo eventual envers la fin da sia carriera, lura er cun dapli experientscha, sa participass el gugent ina giada a questa cursa da prestige, di Vital Albin ch'ha oz 25 onns. Il Cape Epic saja il Tour de France dals mountainbikers ch’ins stoppia bunamain avair fatg ina giada en la vita, uschia il Lumnezian vinavant.
Sco Vital Albin desistan era tut ses collegas d'equipa tar Thömus Maxon cun tranter auter Mathias Flückiger e Lars Forster dal Cape Epic. Omadus èn dentant gia stads ina giada a la partenza en l'Africa dal Sid. Lars Forster ha tranter auter triumfà al Cape Epic il 2019 ensemen cun Nino Schurter.
