Nino Schurter e Sebastian Fini dal Danemarc han terminà il Cape Epic, la cursa da prestige en l’Africa dal Sid, sco segunds. En la davosa etappa a Stellenbosch èn els vegnids 5avels cun in retard da bunamain 5 minutas sin il Svizzer Urs Huber ed il Tudestg Simon Schneller. A la fin èn Schurter e Fini uschia vegnids da defender be piz a cup il segund plaz en il classament general.
Avant in onn era Nino Schurter vegnì terz ensemen cun ses collega d’equipa Andri Frischknecht. Sin sia terza victoria a questa cursa extrema sto il mountainbiker da Tersnaus uschia spetgar vinavant. Il 2017 aveva Schurter gudagnà cun Matthias Stirnemann ed il 2019 cun Lars Forster.
Podest Cape Epic 2024 – umens elita:
- Matthew Beers (Africa dal Sid) e Howard Grotts (USA) 25:22:17 uras
- Nino Schurter (Svizra) e Sebastian Fini (Danemarc) +11:07 minutas
- Hans Becking (Pajais Bass) e Wout Alleman (Belgia) +11:36 miuntas
Classament general Cape Epic 2024
Ils gronds victurs dal Cape Epic da quest onn èn il Sidafrican Matthew Beers e l'American Howard Grotts. Omadus na gudognan dentant betg per l’emprima giada il Cape Epic che vala sco la pli dira cursa da mountainbike insumma e che vegn uschia er numnada il Tour de France dals mountainbikers. Howard Grotts veva triumfà il 2018 ensemen cun il campiun olimpic dal 2012 a Londra, il Tschec Jaroslav Kulhavy e Matthew Beers il 2021 ensemen cun il Franzos Jordan Sarrou e l’onn passà ensemen cun l’American Christopher Blevins.
Defects tecnics e las chommas han franà Schurter e Fini
Cumenzà veva il Cape Epic optimal per Nino Schurter e Sebastian Fini. Els han gudagnà il prolog ed uschia stads ils emprims leaders da questa cursa da prestige. Cun gudagnà la quarta etappa, l’etappa roiala ch’è vegnida scursanida pervia da la chalira, èn els stads ina segunda giada sisum il podest. Silsuenter èn els però vegnids franads d’intgins defects tecnics ed en las davosas etappas han las forzas mancà per triumfar al Cape Epic. Cunzunt Sebastian Fini n’ha betg gì las chommas ch’i vess duvrà per batter Matthew Beers e Howard Grotts.
Victoria Svizra en l’etappa finala
La 7avla e davosa etappa han gudagnà il Svizzer Urs Huber ensemen cun il Tudestg Simon Schneller. Els dus han fatg tempo gia davent da la partenza ed uschia gia baud pudì sa distanziar da la concurrenza. A la fin han Huber e Schneller gudagnà questa etappa sur 67 kilometers cun 2000 meters differenza d’autezza a Stellenbosch cun in avantatg da passa duas minutas sin il duo talian cun Fabian Rabensteiner e Samuele Porro. Urs Huber dal chantun Argovia, 5 giadas campiun svizzer da maraton, aveva gudagnà il 2016 il Cape Epic ensemen cun il Tudestg Karl Platt.
Resultat 7. etappa – umens elita:
- Simon Schneller (Germania) ed Urs Huber (Svizra) 2:52:08 uras
- Fabian Rabensteiner (Italia) e Samuele Porro (Italia) +2:16 minutas
- Matthew Beers (Africa dal Sid) e Howard Grotts (USA) +3:08 minutas
Triumf total per Nicole Koller
Tar las dunnas han la Svizra Nicole Koller e l’Ollandaisa Anne Terpstra dominà il Cape Epic da l’emprim fin il davos di. Koller e Terpstra han gudagnà tut las etappas a questa cursa extrema ed uschia er il classament general. Per la Turitgaisa Nicole Koller ch’ha 26 onns èsi il pli grond success da la carriera.
L’etappa finala sur 67 kilometers a Stellenbosch han Koller e Terpstra gudagnà suveran cun in avantatg da 4:45 minutas sin l’Austriaca Mona Mitterwallner e la Sidafricana Candice Lill che vegnan segundas en il classament general, quai cun in retard da total 8:36 minutas. Terzas en il classament general vegnan l’Argentina Sofia Gomez Villafane e Samara Sheppard da la Nova Zelanda (+35:48 minutas).
6. etappa: Schurter e Fini perdan il contact
A la segunda davosa etappa dal Cape Epic han Nino Schurter e Sebastian Fini dal Danemarc stuì magunar ina terrada. Il duo svizzer-danais ha gì da morder e la finala cuntanschì l’arrivada be sco 9avel. Schurter e Fini han pers en questa etappa sur 87 kilometers cun 2'400 meters differenza d’autezza cun partenza ed arrivada a Stellenbosch 6:25 minutas sin il Sidafrican Matthew Beers e l’American Howard Grotts ch’èn uschia sin buna via da triumfar al Cape Epic 2024. Beers e Grotts avevan gia gudagnà la 5avla etappa.
Oz avain gia baud vesì che nus n’avain betg ina schanza da cumbatter per la victoria. Uss è noss focus da terminar questa cursa sin il segund plaz.
Sco gia il di avant è cunzunt Sebastian Fini vegnì als cunfins. Nino Schurter è en furma, ha fatg tempo e manà durant quasi l’entira etappa, adina dentant er stuì mirar enavos che ses partenari saja anc vidlunder.
Resultat 6. etappa – umens elita:
- Matthew Beers (Africa dal Sid) e Howard Grotts (USA) 3:46.48 uras
- Fabian Rabensteiner (Italia) e Samuele Porro (Italia) +0:41 minutas
- Hans Becking (Pajais Bass) e Wout Alleman (Belgia) +1:50 minutas
En il classament general vegnan Nino Schurter e Sebastian Fini da defender il segund plaz. Il retard sin ils leaders, Matthew Beers e Howard Grotts, munta dentant a 9:22 minutas avant l’etappa finala. Ils terzs, l’Ollandais Hans Becking e Wout Alleman da la Belgia han in retard da 10:33 minutas ed ils quarts, il Tudestg Andreas Seewald che parta cun il campiun svizzer da maraton, Marc Stutzmann, han in retard da 13:57 minutas. Durant ch’il duo Beers/Grotts han procurà per ina pre-decisiun en la 6avla etappa pudessi anc vegnir in dir cumbat per ils ulteriurs plazs da podest a questa cursa da prestige.
Classament general Cape Epic 2024
Tar las dunnas na mida nagut
Nicole Koller ed Anne Terpstra restan ina classa per sa sezzas a quest Cape Epic. Il duo svizzer-ollandais ha er gudagnà la 6avla etappa, sco tut las etappas avant. Paucs kilometers avant l’arrivada han Koller e Terpstra pudì sa distanziar da las davosas concurrentas, l’Austriaca Mona Mitterwallner e la Sidafricana Candice Lill ch’han la finala pers exact ina minuta.
En il classament general han la Turitgaisa Nicole Koller e l’Ollandaisa Anne Terpstra da nov in avantatg da 3:51 minutas sin Mitterwallner e Lill avant l’etappa finala da 67 kilometers a Stellenbosch.
5. etappa: Schurter e Fini vegnan segunds, perdan dentant temp
Nino Schurter, il victur dal Cape Epic 2017 e 2019, e ses partenari dal Danemarc, Sebastian Fini, han terminà la 5avla etappa sin il terz plaz. Paucs kilometers avant l’arrivada a Wellington ha il duo svizzer-danais pers il contact cun las duas gruppas da testa, tranter auter cun ils leaders, il Sidafrican Matthew Beers e l’American Howard Grotts, ed uschia pers fin la fin 57 secundas en questa etappa ch’è cun 70 kilometers e 1'750 meters differenza d’autezza stada ina da las curtas a quest Cape Epic 2024. Durant che Nino Schurter para gia d'avair chattà sia top furma èsi Sebastian Fini ch'ha danovamain patì sin ils davos kilometers. Per il duo Beers/Grotts èsi stà l'emprima victoria d'etappa.
Resultat 5. etappa – umens elita:
- Matthew Beers (Africa dal Sid) e Howard Grotts (USA) 2:46.09 uras
- Andreas Seewald (Germania) e Marc Stutzmann (Svizra) +12 secundas
- Nino Schurter (Svizra) e Sebastian Fini (Danemarc) +57 secundas
En il classament general restan Nino Schurter e Sebastian Fini sin il segund plaz, uss dentant cun in retard da 2:57 minutas sin Matthew Beers, il victur da l’onn passà, e Howard Grotts. Ils terzs, l’Ollandais Hans Becking e Wout Alleman da la Belgia han gia in retard da 8:43 minutas.
Classament general Cape Epic 2024
Nicole Koller sin buna via da triumfar
6avel di – 6avla etappa – 6avla victoria per la svizra Nicole Koller al Cape Epic. Ensemen cun sia partenaria ollandaisa Anne Terpstra ha la Turitgaisa er laschà nagina schanza a la concurrenza en la 5avla etappa. Il duo svizzer-ollandais ch’è ha gudagnà questa etappa cun in avantatg da 20 secundas sin l’Austriaca Mona Mitterwallner e la Sidafricana Candice Lill, il sulet duo che vegn da restar sin ils chaltgogns a Koller e Terpstra.
En il classament general han Nicole Koller ed Anne Terpstra da nov in avantatg da 2:51 minutas sin Mitterwallner e Lill ed èn uschia sin buna da triumfar al Cape Epic, quai ch’è fiss il pli grond success en la carriera da Nicole Koller. I mancan anc duas etappas.
4. etappa: Schurter e Fini gudognan etappa roiala
Nino Schurter e ses partenari dal Danemarc Sebastian Fini han mussà ina reacziun en la quarta etappa, quai suenter che las davosas duas etappas n’eran betg idas sco giavischà, er pervia d’intgins problems tecnics. Il duo svizzer-danais ha gudagnà questa etappa roiala ch’è dentant vegnida scursanida pervia da la chalira sin 73 kilometers cun 2550 meters differenza d’autezza a Wellington, quai en in sprint final avant il Sidafrican Matthew Beers e l’American Howard Grotts. Ils tezs, il Svizers Marc Stutzmann ed il Tudestg Andreas Seewald, ils victurs da la terza etappa, han cuntanschì l’arrivada cun in retard da 1:10 minutas. Ils leaders e dominaturs dal Cape Epic fin uss, l’Ollandais Hans Becking e Wout Alleman da la Belgia han sco 6avels pers 6:50 minutas.
Resultat 4. etappa – umens elita:
- Nino Schurter (Svizra) e Sebastian Fini (Danemarc) 3:22.39 uras
- Matthew Beers (Africa dal Sid) e Howard Grotts (USA) +0 secundas
- Andreas Seewald (Germania) e Marc Stutzmann (Svizra) +1:10 minutas
Er en il classament general han Schurter e Fini gudagnà in plaz. Da nov sa chatta il duo svizzer-danais sin il segund plaz cun in retard d'exact duas minutas sin ils novs leaders, Matthew Beers e Howard Grotts. Hans Becking e Wout Alleman sa chattan da nov sin il terz plaz cun in retard da passa tschintg minutas.
Koller e Terpstra simplamain betg da franar
Tar las dunnas d’elita gudognan la Svizra Nicole Koller e l’Ollandaisa Anne Terpstra er la quarta etappa, l’etappa roiala. En in sprint final battan els il duo cun Sofia Gomez Villafane da l’Argentina e Samara Sheppard da la Nova Zelanda sco era il duo cun l’Austriaca Mona Mitterwallner e la Sidafricana Candice Lill. En il classament general han Koller e Terpstra da nov in avantatg da 2:31 minutas sin Mitterwallner e Lill.
Classament general Cape Epic 2024
Ronny Cavegn puspè a la partenza
Ils Lumnezians èn omadus puspè da la partida. Ronny Cavegn è sa revegnì da ses problems cun il magun ed è partì a la quarta etappa. Per la terza etappa dad ier aveva el stuì dar forfait. Norbert Cavegn ha fatg l'etappa dad ier sco sulet. La quarta etappa n'èn els però betg ir ensemen, mabain mintgin individual.
3. etappa: Schurter e Fini crodan enavos
Nino Schurter e Sebastian Fini n’han betg pudì cumbatter per la victoria en la terza etappa dal Cape Epic, in'etappa da transfer sur 94 kilometers cun 2'100 meters differenza d'autezza da Saronsberg a Wellington. Gia baud han els pers il contact cun la gruppa da testa, quai er puspè pervia dad in defect tecnic. Tar Fini è la chadaina ruta. A la fin han il duo svizzer-danais cuntanschì l’arrivada sco 6avel cun in retard da 4:09 minutas.
Gudagnà l’etappa ha Marc Stutzmann, il campiun svizzer da maraton, ensemen cun il Tudestg Andreas Seewald. Els han pudì distanziar la concurrenza, tranter auter er ils actual leaders dal Cape Epic, l’Ollandais Hans Becking e Wout Alleman da la Belgia ch’èn vegnids quarts en questa etappa, per bunamain ina minuta.
Resultat 3. etappa – umens elita:
- Andreas Seewald (Germania) e Marc Stutzmann (Svizra) 3:40.24 uras
- Matthew Beers (Africa dal Sid) e Howard Grotts (USA) +49 secundas
- Georg Egger (Germania) e Lukas Baum (Germania) +50 secundas
En il classament general han Nino Schurter e Sebastian Fini pers in plaz. Da nov sa chattan Schurter e Fini sin il terz plaz cun in retard da 3:47 minutas sin Hans Becking e Wout Alleman.
Koller e Terpstra domineschan vinavant
Tar las dunnas d’elita procuran vinavant Nicole Koller ed Anne Terpstra per la musica. Il duo svizzer-ollandais ha er gudagnà la terza etappa, quai cun in avantatg da 1:16 minutas sin la pli grondas concurrentas a questa cursa d’etappas, l’Austriaca Mona Mitterwallner e la Sidafricana Candice Lill.
En il classament general han Koller e Terpstra ch’han gudagna tut las etappas fin oz uss in avantatg da 2:29 minutas sin Mitterwallner e Lill.
Classament general Cape Epic 2024
Déjà-vu tar il duo lumnezian
Sco gia tar la premiera avant dus onns na vegnan Norbert e Ronny Cavegn betg da terminar communablamain il Cape Epic, la cursa da prestige en l’Africa dal Sid. Ronny Cavegn ha ord motivs da sanadad betg pudì ir a la partenza da la terza etappa. Avant dus onns avev’el stuì dar si gia suenter il prolog pervia d’ina embolia dal lom.
E sco avant dus onns ha Norbert Cavegn cuntinuà sco sulet il Cape Epic. L’arrivada da la terza etappa sur 94 kilometers ha el cuntanschì suenter 5:54.06 uras. Ronny Cavegn mira da sa revegnir tant pli spert per tuttina anc pudair parter a las davosas etappas da questa cursa extrema.
2. etappa: Schurter e Fini vegnan franads
Nino Schurter e Sebastian Fini dal Danemarc han terminà la segunda etappa sur 97 kilometers cun 2'200 meters differenza d’autezza sin il segund plaz, cun in retard da passa duas minutas sin l’Ollandais Hans Becking e Wout Alleman da la Belgia. Cunquai n’èn Schurter e Fini er betg pli ils leaders dal Cape Epic. En il classament general han els uss in pitschen retard da 32 secundas sin Becking ed Alleman.
Resultat 2. etappa – umens elita:
- Hans Becking (Pajais Bass) e Wout Alleman (Belgia) 4:05.22 uras
- Nino Schurter (Svizra) e Sebastian Fini (Danemarc) +2.02 minutas
- Georg Egger (Germania) e Lukas Baum (Germania) +2.07 minutas
Sebastian Fini è gia baud vegnì franà d’in defect tecnic pervia d’in plat – e gia suenter la mesadad da l’etappa avevan Schurter e Fini in retard da passa duas minutas sin la gruppa da testa. A la fin ha il duo svizzer-danais però dà gas ed anc pudì surpassar intginas equipas e terminà l’etappa sin il segund plaz, anc avant il duo tudestg cun Georg Egger e Lukas Baum ed il duo cun il victur da l’onn passà, il Sidafrican Matthew Beers che parta quest onn cun l’American Howard Grotts. Quai èn tenor il palpiri era las equipas che cumbattan per la victoria al Cape Epic 2024.
Terz di – terza victoria per Nicole Koller
Tar las dunnas d’elita han la Svizra Nicole Koller e sia partenaria ollandaisa Anne Terpstra er gudagnà la segunda etappa. Quest duo ha attatgà curt avant l’arrivada ed uschia anc pudì sa distanziar per paucas secundas da l’Austriaca Mona Mitterwallner che parta ensemen cun la Sidafricana Candice Lill. En il classament general han Koller e Terpstra uss in avantatg da 1.13 minutas sin Mitterwallner e Lill. Las terzas, Sofia Gomez Villafane da l’Argentina e Samara Sheppard da la Nova Zelanda, han gia in retard da bunamain set minutas.
Classament general Cape Epic 2024
Duo Cavegn ha patì
A Norbert e Ronny Cavegn n’èsi betg ì sco giavischà. Ronny Cavegn ha patì da problems da sanadad ed entaifer l’etappa er stuì far in stop tar il medi. Ils Lumnezians èn la finala tuttina vegnids da terminar l’etappa, quai sco 23avels en lur categoria. Tut en tut èn els stads 6:58 uras sin viadi. Uss vali da sa revegnir tant pli spert e sperar ch’ils medicaments gidian per pudair ir a la partenza da la terza etappa che maina da Saromsberg a Wellington.
1. etappa: Schurter e Fini perdan il sprint final
Suenter la victoria en il prolog han Nino Schurter e Sebastian Fini er persvadì en l’emprima etappa sur 88 kilometers cun 2'450 meters differenza d’autezza. Il duo svizzer/danais è adina stà en la gruppa da testa e la finala sulet vegnì battì da l'Ollandais Hans Becking e Wout Alleman da la Belgia.
Resultat 1. etappa – umens d’elita:
- Hans Becking (Pajais Bass) e Wout Alleman (Belgia) 3:38.48 uras
- Nino Schurter (Svizra) e Sebastian Fini (Danemarc) +2 secundas
- Matthew Beers (Africa dal Sid) e Howard Grotts (USA) +21 secundas
Sin ils davos kilometers ha adina puspè Nino Schurter augmentà il tempo per uschia sa distanziar da la concurrenza. Ma er per ses collega Sebastian Fini è quest tempo stà da memia. En il sprint final ha Fini stuì laschar surpassar il duo Becking/Alleman, ils sulets ch’han pudì restar durant l’entira etappa sin ils chaltgogns a Schurter e Fini. En il classament general ha il Lumnezian, che parta per l’emprima giada ensemen cun Sebastian Fini, percunter pudì augmentar l’avantatg sin Matthew Beers e Howard Grotts sin 1 minuta e 10 secundas.
Nicole Koller betg da franar
La Turitgaisa da 26 onns che parta al Cape Epic cun l’Ollandaisa Anne Terpstra han suenter il prolog er gudagnà l’emprima etappa. Il duo svizzer/ollandais ha suenter 88 kilometers battì en il sprint final il duo cun l’Austriaca Mona Mitterwallner e la Sidafricana Candice Lill ch'aveva gia terminà il prolog sin il segund plaz. Cumplettà il podest sco terzas en questa emprima etappa han Sofia Gomez Villafane da l’Argentina e Samara Sheppard da la Nova Zelanda. En il classament general n’hai dà naginas midadas. Nicole Koller ed Anne Terpstra restan a la testa cun in avantatg da passa ina minuta.
Classament general Cape Epic 2024
Norbert e Ronny Cavegn sut ils top 20
Il duo lumnezian cun Norbert e Ronny Cavegn ha terminà l'emprima etappa sin il 19avel plaz en la categoria «Grand Masters Men». Per ils 88 kilometers cun 2'450 meters differenza d'autezza han els duvrà 5:36.08 uras. En il classament general han els pers dus plazs e sa chattan da nov sin il 19avel plaz da passa 120 equipas.
Prolog: Partenza perfetga per Nino Schurter
Il Cape Epic, la cursa da mountainbike sur otg dis en l’Africa dal Sid, ha cumenzà a moda perfetga per Nino Schurter. Ensemen cun ses partenari dal Danemarc, Sebastian Fini Carstensen, ha el gudagnà il prolog sur 26 kilometers cun passa 1000 meters differenza d’autezza, quai cun in avantatg da bunamain ina minuta sin il Sidafrican Matthew Beers, il victur dal 2023 che parta quest onn ensemen cun l’American Howard Grotts.
Resultat prolog – umens d'elita:
- Nino Schurter (Svizra) e Sebastian Fini (Danemarc) 1:02.38 uras
- Matthew Beers (Africa dal Sid) e Howard Grotts (Stadis Unids) +0.51 minutas
- Hans Becking (Pajais Bass) e Wout Alleman (Belgia) +1.32 minutas
Er tar las dunnas d'elita hai dà ina victoria svizra entras Nicole Koller che parta ensemen cun l'Ollandaisa Anne Terpstra. Ellas èn stadas en quest prolog passa ina minuta pli spertas che l'Austriaca Mona Mitterwallner che parta ensemen cun la Sidafricana Candice Lill.
Duo Cavegn persvada en il prolog
Er cumenzà bain ha il Cape Epic, che vala sco la pli dira cursa da mountainbike dal mund, per il duo lumnezian cun Norbert e Ronny Cavegn. En la categoria «Grand Masters Men» han els terminà il prolog sin il 17avel plaz da 123 equipas. Per ils 26 kilometers cun 1'050 meters differenza d'autezza han els duvrà 1:31.49 uras.
PREVISTA: Trais Lumnezians al «Tour de France» dals mountainbikers
Norbert e Ronny Cavegn sco er Nino Schurter partan al Cape Epic en l’Africa dal Sid che dura dals 17-24 da mars. Entant che Schurter parta sco in dals gronds favurits a questa cursa extrema sur otg dis, han Norbert e Ronny Cavegn la finamira da finalmain terminar questa cursa che vala sco la pli dira en la scena da mountainbike. Avant dus onns avevan els stuì dar si pervia da malsognas e blessuras.
Il plaschair è grond ed igl è uras ch’i va liber ch’ins possia lura er far in crutsch davos questa finamira.
Norbert Cavegn, president dal Openair Lumnezia, e Ronny Cavegn, il frar da l'anteriur skiunz Franco Cavegn, èn sa participads l’emprima giada il 2022 al Cape Epic en l’Africa dal Sid. Da questa premiera n’ha il duo lumnezian però betg bunas regurdientschas. Ronny era vegnì franà gia suenter l’emprima etappa pervia d’ina embolia dal lom e Norbert ch’ha cuntinuà la cursa persuls, ha stuì ceder avant l’etappa finala perquai ch’el è cupitgà ed ha rut ina spatla.
Nossa finamira n’è betg da gudagnar, mabain vegnir atras sin ina moda che na fa betg memia mal.
Quai ch’è capità avant dus onn n’ha dentant betg franà ils dus Lumnezians. Els han adina gì la visiun da terminar ina giada ensemen questa cursa giudim l’Africa. Norbert e Ronny Cavegn han dentant dà in zic temp e laschà ora l’ediziun 2023. Ma uss èn els pronts. Omadus han trenà tenor in plan da trenament ed er dà paisa al nutriment per dumagnar questa cursa senza patir memia fitg.
Nino Schurter – il star e grond favurit
Il mountainbiker oriund da Tersnaus parta gia per l’otgavla giada al Cape Epic. L’emprima giada è Schurter sa participà il 2010 ensemen cun Florian Vogel. Fin oz ha il meglier mountainbiker dal mund er triumfà duas giadas al Cape Epic, il 2017 ensemen cun Matthias Stirnemann ed il 2019 ensemen cun Lars Forster. Quest onn parta Nino Schurter ensemen cun Sebastian Fini Carstensen dal Danemarc. Sin il palpiri tutgan els tranter ils gronds favurits.
617 kilometers – 16’500 meters differenza d’autezza
Il Cape Epic 2024 cumenza la dumengia, ils 17 da mars cun in prolog a Lourensford Wine Estate. Silsuenter suondan set etappas en l’ost da Cape Town. A fin va il Cape Epic la dumengia, ils 24 da mars a Stellenbosch. Tut en tut han ils radund 650 participants, da profis fin amaturs che partan mintgamai en teams da dus d’absolver 617 kilometers cun total 16’500 meters differenza d’autezza.
