- Suenter che bunamain tut las vuschs èn dumbradas, vegn Putin sin passa 87% da las vuschs. Quai ha communitgà la cumissiun electorala.
- La televisiun statala russa ha declerà Putin sco victur suenter ch'ils locals d'eleger èn serrads.
Cumpareglià cun l’ultima elecziun dal president avant sis onns ha Putin uschia fatg in plus da passa 10 puncts procentuals (2018: 76,7%). I sa tracta cun quai dal meglier resultat che Putin ha insumma realisà. Igl è la tschintgavla giada che Wladimir Putin, ch'ha 71 onns, è vegnì elegì. Dapi il december 1999 è el a la pussanza russa. La participaziun a l’elecziun ha muntà a passa 74%, er quai saja in record.
L’elecziun è dentant ni stada libra ni faira. L’opposiziun discurra en quest connex be d’ina farsa. Er la cuminanza internaziunala ha crititgà l'elecziun.
Il vest crititgescha l'elecziun
Regenzas dal vest han condemnà la reelecziun dal president russ Wladimir Putin. En Germania per exempel han il president da la republica federala tudestga Frank-Walter Steinmeier ed il chancelier Olaf Scholz communitgà ch'els na gratuleschian betg a Putin. Il president ucranais Selenski ha discurrì dad in'elecziun falsifitigada. Putin veglia simplamain restar sia entira vita a la pussanza. Il schefdiplomat da l'UE Josep Borrell ha er crititgà fermamain l'elecziun. Quella na saja stada ni libra ni faira, ha declerà l'incumbensà per fatgs da l'exteriur da l'Uniun europeica.
Il Departament da l'exteriur da la Svizra prenda per enconuschientscha il resultat da l'elecziun dal president en Russia, quai scriva l'EDA. Era deplorescha la Svizra uffiziala che nagina missiun d'observaders da las elecziuns è stada lubida. Il departament condemnescha la decisiun da la Russia d'era far elecziuns en ils territoris occupads en l'Ucraina. La Svizra uffiziala na renconuschia betg l'integraziun dals territoris ucranais en la federaziun russa, uschia il departament da l'exteriur vinavant. Quai saja ina greva violaziun da la suveranitad e da l'integritad territoriala da l'Ucraina.
Elecziun senza vair candidat d'opposiziun
L'elecziun en Russia vegn taxada sco nundemocratica, cunquai che nagina candidata u candidat da l'opposiziun è stà acceptà. Plinavant na datti en Russia nagina libertad da reuniun e las medias èn controlladas dal Kremlin. Medias independentas vegnan persequitadas politicamain. Persunas che pensan auter, che crititgeschan la guerra da Putin u l'apparat da pussanza ristgan chastis ed arrest.
Sper Putin hai dà trais candidats, quels èn dentant tuts sin la lingia dal Kremlin e n'han a partir dal cumenzament gì nagina schanza. Tenor emprims resultats han tut ils trais candidats survegnì pli pauc che 4% da las vuschs.
Acziuns da protesta en Svizra
A Genevra èn la dumengia da mezdi radund 400 Russas e Russ sa radunads. Ils blers dad els èn suandads in appel da la vaiva dad Alexej Nawalny. Lezza aveva ditg dad ir dal medem temp a l'urna per eleger in auter candidat che Putin. A Berna han radund 1'000 persunas protestà cunter l'elecziun da Wladimir Putin. La colonna avant l’ambassada russa a Berna saja stada plirs tschient meters lunga, quai ha ditg in reporter da l'agentura da novitads Keystone-SDA.
Er en Russia hai dà acziuns da protest cunter il Kremlin. A chaschun da quellas hai er dà diversas arrestaziuns. L'organisaziun Ovd-Info ha dumbrà enfin dumengia saira 80 arrestaziun – 30 da quellas en la citad da Kasan. Er burgaisas e burgais a Moscau e San Petersburg èn stads pertutgads.
