Cuira ha acceptà la cuntraproposta dal cussegl da la citad. Quai cun 54,66% da las vuschs inoltradas. En questa cuntraproposta n'èn nagins perimeters definids – sco en l'iniziativa – persuenter l'intenziun d'examinar en il futur mintga project da via e d'adattar quel uschè bain sco pussaivel als basegns dal clima, u crear dapli spazi per velos e peduns. Sco Sandra Maissen, responsabla da la citad Cuira, ha ditg envers RTR, hajan ins blers projects da bajegiar, ed ins vegnia ad examinar nua ch'ins possia per exempel plantar dapli plantas u agiuntar mesiras per diminuir il traffic.
L'iniziativa da clima da la citad è vegnida refusada, cun 59,94% da las vuschs. Las iniziantas han annunzià da guardar fitg bain co la citad implementescha mesiras per la protecziun dal clima en ils projects actuals.
Dapli spazi verd e vias da peduns e velos
L'iniziativa vuleva, ch'i vegnia transfurmà durant ils proxims 10 onns mintg'onn 1% da las vias en surfatschas verdas, en vias segiras per peduns e velos u en zonas da scuntrada. Ina gronda part da quai avess ins gist pudì colliar cun il project da la IBC, che schlargia sia rait termala e chaschuna atras quai uschè u uschia plazzals sin las vias da Cuira.
La dumonda da decisiun n'è betg stada necessaria. La participaziun a la votaziun è stada tar 52,49%.
Tenor ils quints dal cussegl da la citad da Cuira avessan muntà ils custs da l'iniziativa a 35 milliuns francs per ils 10 onns. La cuntraproposta chaschuna sur 10 onns custs da radund 10 milliuns francs.
