Actualmain emprovan cugliuns d'engular daners via cartas da credit cun sa schluitar en la communicaziun tranter hotels e clientella e lura trametter messadis fauss.
A l'emissiun da consuments Espresso da SRF èn enconuschents cas, nua che persunas han survegnì curt avant che partir en vacanzas in messadi da l'hotel cun la dumonda da confermar e pajar la cudeschaziun. Uschiglio vegnia quella puspè stornada. Quai tuna da princip logic cunquai che l'hotel na vul er betg star là cun combras cudeschadas e tuttina vidas. Quests messadis eran però fauss e vulevan be access a la carta da credit dals clients.
Adatg tar messadis cun links
Ina da las pli enconuschentas plattafurmas da cudeschaziun e pertutgada da tals cas è booking.com. Ils responsabels laschan savair che ni la plattafurma sezza ni ils hotels dumonda mai via messadis da chat u mails cun links infurmaziuns da pajament. Plinavant stoppia esser ch'ils cugliuns rivian via ils hotels a las datas da clientas e clients. Pia ch'in collavuratur u ina collavuratura da l'hotel stoppia avair cliccà sin in e-mail da «phishing» e ch'ils hackers sajan uschia vegnids a las datas da la cudeschaziun. Tar booking.com sez n'haja numandamain dà naginas foras nua che datas sajan svanidas.
E tge sch'igl è tuttina capità?
Lura èsi da serrar la carta da credit, annunziar il cas a la plattafurma ed a la polizia e da guardar sch'ins survegn enavos insatge. La schanza è dada ma i n'è betg garantì. Las bancas sa refereschan en tals cas savens sin il punct ch'ins saja sez la culpa sch'ins sa laschia cugliunar. Qua dependia da la culanza. Booking.com ha ditg ch'ins spetgia la reacziun da la banca ed en il cas che lezza na fatschia nagut, porschian ins maun per sclerir tut sco er per survegnir enavos ils daners engulads.
