Las cundiziuns generalas da fatschenta (AGBs) da Paypal: 20'000 pleds. Anc dapli èni tar Airbnb: 36'000 pleds. Per leger quai dovran ins bel e bain in mez di. Ston ins dentant vairamain leger quai?
D'ina vart èn las cundiziuns generalas da fatschenta liantas sco mintga contract. Da l'autra vart na valan ellas betg, sch'ellas dischavantagian fermamain. Tuttina pon ins desister tras las cundiziuns generalas da tscherts dretgs.
Las cundiziuns generalas e l'uschènumnà stampà pitschen èn da nausch num. Savens dat ins per exempel en concurrenzas da premis la lubientscha là d'utilisar infurmaziuns per marketing. Las infurmaziuns vegnan vendidas vinavant, e per part e publitgadas e duvradas per autras chaussas.
Il principi da quellas cundiziuns generalas da fatschenta è «maglia la minestra u siglia or da la fanestra». Per malcuntentientscha ha per exempel ina midada tar la Sunrise procurà ch'ils pretschs vegnian adattads a la chareschia. Sin la pussaivladad da terminar il contract n'è betg vegnì renvià.
I dat er cas pli serius. Custs che vegnan zuppentads en il stampà pitschen, u che contracts vegnan prolungads automaticamain, u ch'i na dat nagina garanzia, u eba che datas persunalas pon vegnir vendidas.
La protecziun giuridica Ktipp ha quintà or che las cundiziuns generalas da fatschenta da apps normalas sin il handy fissan manaivel uschè lungas sco l'emprim cudesch da Harry Potter. E quai saja tenor pliras professuras e professurs da dretg memia lung. Er passaschas nunusitadas stoppian vegnir explicitamain menziunadas, e valian uschiglio betg.
La fundaziun da protecziun da consumentas e consuments ha publitgà ina glista cun tips sin tge ch'igl è da guardar tar cundiziuns generalas da fatschenta. Ed ella ha er sviluppà in plugin per il browser che legia per ins quels lungs texts e avertescha da passaschas heiclias.
Pia n'èn las uschenumnadas AGBs betg automaticamain valaivlas. Brevs da chadaina ch'èn en il passà gugent vegnidas tramessas vinavant e che renvieschan midadas da talas cundiziuns tar Facebook, Whatsapp e cumpignia, na tanschan dentant medemamain betg per refusar. I dovra ina decisiun avant dretgira.
