Per sa proteger dovri buns pled-clavs. U gist in servetsch che surpiglia quai. En quest cas n'èsi dentant betg d'emblidar il pled-clav per il servetsch da pleds-clav.
Per in bun pled-clav pon ins duvrar questa glista.
- pli lung che 10 segns
- ha bustabs pitschens e gronds
- sper bustabs ha el er cifras e segns
Lura èsi in bun pled-clav. Da resguardar èsi dentant er ch'ins na duai betg pudair lignar u construir el. Pleds ch'han in connex direct cun la persuna, sco il club preferrì da ballape u il num da l'animal da chasa n'èn betg adattads, er la data da naschientscha n'è betg ina buna idea. Gia pli adattà è p. ex. ina craziun or dals prims gustabs dal refrain da la chanzun preferida.
Servetschs da pled-clav
La fundaziun da protecziun da consumentas e consuments propona sco manager da pleds-clav «Keepass». Quai è in servetsch che creescha ed arcunescha tut ils pleds-clav a moda segira e dovra sulettamain in singul pled clav. In autra app che tant la fundaziun da protecziun da consumentas e consuments sco er il Kassensturz cusseglia è «1Password». Quella n'è però betg gratuita.
Er iCloud offrescha per ils products d'Apple in tal servetsch. Qua èsi dentant impurtant da activar la protecziun da datas avanzada. Uschigliò avertescha la fundaziun da consumentas ch'ellas na sajan betg segiras.
Er Google ha annunzià l'emna passada in servetsch che surpiglia il login cun in nov sistem da segirezza. L'utilisader dovra per quel be pli in sulet pled-clav. Ed il nov tar quest sistem: Ils pleds-clav na vegnan betg pli tramess vi e nà tranter l'apparat da l'utilisadra ed il sistem da la fatschenta, mabain ch'i dat be pli ina sort pled clav public per s'identifitgar ed il pled-clav secret resta be pli sin l'apparat da l'utilisader.
