Sch'ins tschertga «Krankenkassenvegleich» sin Google, lura survegnan ins passa 8 milliuns resultats da tschertga. Dentant betg tut ils tools fan ina retschertga objectiva. Quai ha dacurt mussà il cass da «krankenkassenadmin.ch». Davart quel ha il magazin da consuments «Espresso» da SRF rapportà. Cun il pled «admin» en la domain e cun ina crusch svizra sin la pagina, avevi l'apparientscha d'esser ina purschida uffiziala da la Confederaziun. Atgnamain steva in'assicuranza davos quella pagina d'internet. In congual objectiv n'era pia betg pli dà.
Intgins tools pratics
Cun paucs clics ed intginas indicaziuns pon ins congualar online las differentas purschidas. Uschia chattan ins la versiun la pli bunmartgada.
- Per congualar las differentas cassas da malsauns porscha la Confederaziun la plattafurma Priminfo. Quella porscha ina survista da tut las cassas e quant bler ch'ellas custan. Uschia pon ins chattar in'alternativa pli bunmartgada.
- La Fundaziun per la protecziun da consuments porscha ina sumeglianta survista. Plinavant datti ils links directs. In'autra funcziun pratica: cun in clic mussa la plattafurma, tge cundiziuns che valan e fa attent sin chaussas che la cassa na paja betg. Sin la pagina da la fundaziun pon ins era crear brevs da model per disdir ubain s'annunziar tar ina cassa.
- La plattafurma Comparis porscha er in tool da congual. Qua datti era la pussaivladad da sortir la glista tenor cuntentientscha dals clients. Purschidas da reclama vegnan era mussadas, dentant marcà cleramain sco reclama.
RTR ha empruvà ora quests trais tools da congual cun differentas cumbinaziuns da lieu d'abitar, annada, model e franschisa. Ils resultats dals differents tools eran mintgamai identics.
