L’agl d’urs - In'erva da primavaira cun ina istorgia speziala

L’agl d’urs, enconuschent er sco Allium ursinumEn, è in ingrediaint fitg popular en la cuschina da primavaira. Ma pertge porta questa erva il num dal rètg dal guaud, l’urs? En «Nossa Cuschina» explorain nus ils origins e las legendas che collian il agl d'urs aromatic cun l’urs e sia forza.

Legenda e tradiziun istorica dal agl d'urs

Gia ils Romans han duvrà il num latin Allium ursinum, che signifitga «agl d’urs». En bleras culturas simbolisescha l’urs forza e fermezza. In’istorgia raquinta che l’agl d’urs saja l’emprima planta che l’urs maglia suenter ses letarg d’enviern per recuperar energia. Questa credenza ha manà a l’idea che er ils umans possian survegnir forza d’urs tras il consum da questa erva.

Ieli da l'agl d'urs fatg sez

In gust aromatic ed in’attenziun speziala

L’agl d’urs è apprezià en la cuschina per ses gust intensiv. El vegn duvrà per preparar pestos, salatas u er per recepts creativs sco guafflas cun agl d’urs.Tuttina datti ina remartga d’attenziun: L’agl d’urs po vegnir scumbaglià cun plantas toxicas sco la lischiva da matg.

La dumonda sch’ils urs maglian propi agl d’urs na po uschia betg vegnir respundida dal tuttafatg. Tenor observaziuns dal WWF Svizra datti confermas che urs en l’America dal Nord han gia gustà l'agl d'urs. Questa planta resta pia fascinanta, tant per ils umans sco per ils animals dal guaud.

Cun sia istorgia multifara, sia versatilitad en la cuschina e sia colliaziun cun la natira, è l’agl d’urs in simbol da la primavaira e da la forza.

Podcast Nossa cuschina

RTR preschenta mintga mesemna in’autra tratga per cuschinar suenter.

Ulteriurs audios e podcasts

Guafflas cun gust aromatic d'agl d'urs

L'emprim recept è dal cuschinier Fatmir Spescha, schef da la cuschina en il Center da sanadad Puntreis. In da ses 28 recepts or da ses cudesch da cuschinar èn guaflas cun agl d'urs. Normalmain enconusch'ins guaflas plitost sco insatge dultg, quai è uss ina varianta salada cun in dip da quarc.

Il «Bärwich»

Il segund recept è in da Gisula Tscharner da Veulden. Ella propona in paunet cun agl d'urs, il «Bärwich». Per l'experienza autentica propona ella da preparar oravant paunets cun in bun paintg d'alp e sal. Impurtant saja chi'ns metta avunda paintg en il «Bärwich». Lura pon ins prender cun sai ils paunets en il guaud, nua chi'ins ramssa agl d'urs frestg. En il guaud vegnan ils paunets giudids subit cun l'agl d'urs frestg. Dentant pon ins era purtar l'agl d'urs a chasa e cumplettar là il snack simpel.