Il pajais en l'ost da l'Africa è la quart gronda exportadra da fluras da tagliar da l'entir mund. Cun vender questas en l'Europa, en Russia ed a l'exteriur arab gudognan els ina milliarda dollars. L'industria da fluras porscha radund 150'000 plazzas da lavur.
Schizunt pli persistentas che quellas dal Pajais Bass duain las rosas da la Kenia esser, mussa in studi da Max Havelaar e Migros. Il pli impurtant factur è en quest cas il clima. Las rosas na dovran betg tanta energia per crescher perquai ch'il sulegl splendura var 12 uras e la temperatura na van betg sut 10 grads. Auter è quai en l'Europa, nua che las fluras vegnan cultivadas en ierts sut vaider.
Tuttina datti era aspects negativs: Per exempel vegn duvrà bler'aua per cultivar las fluras e quella vegn lura tschuffentada cun pesticids. Plinavant na sajan las cundiziuns da lavur era betg uschè bunas. Igl èn cunzunt dunnas che lavuran en questa branscha e quellas na gudognan savens betg avunda per pudair viver sco ch'i tutga ed ellas vegnan para era adina puspè mulestadas sexualmain.
Sche questas fatschentas megliurassan dentant lur cundiziuns da lavur, cunzunt quai che pertutga la paja, e producissan era a moda pli persistenta, empruvassan autras tiaras sco l'Etiopia u l'Uganda da surprender il martgà da fluras da tagl.
