Gia il 2020 han tschintg papagagls grischs en in Zoo englais procurà per lingias grassas, perquai ch'els han provocà ils visitaders dal zoo cun dir zacher e diavel. Cumenzà a blastemmar avevan ils tschintg papagagls grischs che derivan da differents possessurs, en la quarantina suenter l'arrivada en il zoo. Ils animals fitg intelligents han er emprais in da l'auter ed uschia engrondì lur stgazi da pleds.
Per far frunt als papagagls senza maniera èn els vegnids separads da lur collegas papagagls, il manader dal zoo aveva fatg quitads che uffants pudessani tschappar cun la bucca las expressiuns nauschas dals utschels. Dacurt èn anc ina giada trais exemplars papagagls grischs che blastemman vegnids vitiers. Uschia ch'il zoo ha uss ina nova strategia: Ils papagagls malonests dessan vegnir integrads en ina gruppa cun rodund 90 auters da lur spezia, per uschia mussar ad els manieras. In haja la speranza che la disa mala dals otg exemplars svaneschia en la gronda gruppa d'utschels. Il zoo ristga dentant era, ch'els han la fin finala 100 papagagls che din zacher e diavel l'entir di, quai vegnia a sa mussar cul temp di il menader.
