Ins pudess simplamain dischmetter il pignol suenter nadal. I dat dentant alternativas: Per exempel pudess'ins duvrar la roma per cuvierer ils ers en curtin e proteger las plontinas da la fradaglia e dal vent. E la roma è er buna per tegnair davent glimajas, quellas n'han betg gugent il fried da la roma.
Las guilas da pins e tieus han bler vitamin C ed han in effect calmant, quai gida per exempel bain encunter stancladad u dafraid. Metter in tschadun gulias taglià fitg pintg en aua chauda e laschar trair per 10 minutas per far in té. Ubain pon ins er far glatsch, sirup, paintg u toppings cun las guglias dal pignol. Impurtant è che la planta è natirala e betg elavurada.
Uschia po forsa in u l'auter dals 1,4 milliuns pignols daventar in bogn u in té u in sirup.