«Deus in Burnout» – filosofic, satiric e piztgant

«Nus essan in product da la societad, in product d'in grond buatsch!» Cun questa pretensiun procura Luca Maurizio, cabarettist e satiricher da la Bregaglia per perplexadad e provocaziun en ses program actual «Deus in Burnout». La dumonda essenziala e filosofica da ses program scrit aposta per las festivitads da «500 onns Stadi liber da las Trais Lias» è: «Tge pudess nossa societad e nossa democrazia far oz per turnar a la medema forza e creativitad sco avant 500 onns?» La situaziun actuala saja sumeglianta sco avant 500 onns: societad, economia e politica sa chattian sco lezza giada sin pliras cruschadas ed ins na sappia betg en tge direcziun ch'ellas giajan. La resposta filosofica a questa dumonda chatta il cabarettist en la teoria dal buatsch e ses «humusismus». Ma tge sa zuppa davos la teoria dal buatsch e tge rolla gioga Dieu en tut questa istorgia en connex cun il humus? «Vita e Cretta» ha visità il program actual «Deus in Burnout» e sa sprova da chattar las respostas tar Luca Maurizio.