Catolic ma betg cartent
Ina cifra-clav che crescha dapi onns cuntinuadamain en il Grischun, gea en lentira Svizra, è quella da las extradas da la Baselgia. Las cifras che l'Uffizi federal da statistica ha publitgà il schaner passà conferman questa tendenza. Tenor quellas è gia mintga terza persuna en Svizra, quai vul dir 34% da la populaziun, senza confessiun. Dominik Hardegger, schurnalist tar RTR, tutga facticamain gia daditg tar quella gruppa da persunas, pertge cun Baselgia na po el pigliar a mauns pauc fin nagut. Tuttina è el battegià e da pitschen ensi catolic. Ma pertge n'è el mai sortì da la Baselgia? Tge muntan cardientscha e Baselgia anc per el?
Ideas ch'han dà da pensar
Per ir a fund a talas dumondas è Dominik sa mess sin viadi. Il resultat è in film per il format Clic. En quel s'inscuntra el cun in represchentant ed ina represchentanta da la Baselgia: l'uvestg da Cuira Joseph Maria Bonnemain e la teologa Flurina Cavegn. Lur respostas, en tge moda e maniera che la cretta catolica po anc commover ils umans, tge ch'èn las sfidas las pli grondas e pertge ch'i fiss impurtant da restar precis uss en la Baselgia, han dà da pensar a Dominik. Da lur relaziun e da lur via cun Dieu e cun la Baselgia raquintan medemamain l'autura Viola Cadruvi da Turitg, l'um pensiunà Robert Derungs dad Uors e Flurin Monn che studegia a Turitg. Tge experientschas che Dominik Hardegger ha fatg, co ch'ina pitschna panna ha impedì sia sortida da la Baselgia e sch'el è la fin finala sortì u sch'el è anc commember, raquinta el en Vita e cretta.
