3 onns commemoraziuns, festivitads, congress e publicaziuns en tut l'Europa – las festivitads per il 500avel giubileum da la refurmaziun han propi gì dimensiuns grondas.
Na da sa smirvegliar, di il plevon, istoricher e teolog Jan Andrea Bernhard da Glion, che ha manà l'organisaziun da las festivitads . La refurmaziun saja stada dapli ch'ina revoluziun religiusa. Ella saja stada, ensemen cun la renaschientscha e l'umanissem, ina revoluziun sociala ed intellectuala.
Fastizs istorics da la refurmaziun a Glion
Ensemen cun citads illustras sco Turitg, Genevra u Wittenberg figurescha er Glion sin la glista da 102 citads da la refurmaziun en 17 pajais europeics. Glion è vegnì enconuschent pervi dal refurmatur Johannes Comander e ses Artitgels da Glion.
La ierta da Comander vegn vivida anc oz – uschia aveva el fundà il 1537 la sinoda grischuna, che unescha anc oz ina giada ad onn tut las plevonessas ed ils plevons dal chantun.
In artg da cumedia e cudesch fin a la scienzia
Tar las festivitads tutgava sper festas popularas, cudeschs d'uffants ed ina cumedia criminala istorica er la perscrutaziun scientifica. Il sguard intensivà e vegnì fatg tanter scienziads da pliras disciplinas, ma er da differents pajais.
Uschia saja sa mussà, che la refurmaziun n'haja betg exnum purtà la democrazia en Grischun – ma ch'il stadi da las Trais Lias purscheva in fund fritgaivel per ils intents dals refurmaturs.
Cun ina publicaziun scientifica èn idas a fin las festivitads per 500 onns refurmaziun en il Grischun.