«Igl è gia adina stà grev da survegnir visums per ils uffants da Dobrusch. Ma uss na lubescha la regenza dal Belarus nagins viadis pli en l’Europa», di Ruth Keller da l’uniun Agid da Tschernobyl Surselva.
La regenza dal Belarus lubescha nagins viadis pli en l’Europa.
Dapi il 1993 ed enfin al cumenzament da la pandemia da corona han visità mintg’onn 20 fin 25 uffants durant quatter emnas la Svizra. Vegnids èn uffants tranter 8 e 12 onns or da famiglias dischavantagiadas dal Belarus.
Durant il temp en il Grischun han ils uffants abità en famiglias, tranter auter era tar Ruth Keller a Trin. «Igl è stà bel d’avair contact cun uffants che vivan tut auter che nus, da far in plaschair ad els e da mussar che nus stuain era lavurar per avair success.»
A nus fai mal che nus na pudain betg pli dar ina perspectiva als uffants, quai che nus avain pudì far blers onns.
L’uniun Agid da Tschernobyl Surselva cuntinuass gugent cun las vacanzas per uffants da Dobrusch. Ma era els sajan vegnids pli vegls, di Ruth Keller. Ed i saja grev da chattar persunas che dattan dimora als uffants, era perquai che la glieud na saja er betg pli uschè averta per talas chaussas.
Ultra da quai èsi era fitg grev mantegnair il contact cun las famiglias a Dobrusch. I na saja mai stà pussaivel da discurrer u scriver tut libramain.
Nus avain ed avevan il sentiment che brevs ni pacs tramess vegnian controllads.