Durant la festa dal prim avust l'onn 2021 saja l’idea naschida tut spontanamain, sa regorda il co-iniziant ed oz president da l’Uniun Scuol Classics, Andrea Matossi. Da realisar mintga dus onns in festival d’auta qualitad cun plirs concerts en la halla da glatsch Gurlaina a Scuol saja sa verifitgà.
Questa giada procuran 170 persunas per in giudiment musical cun «Carmina Burana» da Carl Orff. In’ovra ch’è main enconuschenta sco la «9avla sinfonia» da Beethoven, ch'aveva furmà la premiera da Scuol Classics l’onn 2024.
Apaina che la glieud auda la tipica melodia dal chor ord Carmina Burana enconuscha ella dalunga l’ovra da Carl Orff.
Pervi da quai haja duvrà questa giada era dapli lavur da promoziun ed explicaziun cun far udir parts da Carmina Burana, quai declara Andrea Matossi.
In mintgadi per la cultura
Il Festival Scuol Classics è actualmain la lavur che occupa ad Andrea Matossi il pli fitg. Dentant tutga tar ses mintgadi er il viandar en la natira. Dapi plirs onns lavura el sco guida da viandar per giasts en Engiadina Bassa. Ultra da quai lavura l’um da 58 onns er en in pitschen pensum per il marketing dal Center da sanadad Engiadina Bassa.
Sias ragischs ha Andrea Matossi en Engiadin’Ota, nua ch’el è creschì si cun dus fragliuns pli vegls a San Murezzan. En famiglia vegniva discurrì puter, ina particularitad en ina vischnanca dominada dal tudestg.
La lingua e la communicaziun ha accumpagnà ad Andrea Matossi durant tut sia vita. Suenter avair fatg in emprendissadi sco tipograf a San Murezzan, s’è l’Engiadinais scolà adina puspè enavant. Uschia ha el fatg tras tut il svilup dals bustabs en plum enfin tar la digitalisaziun e l’intelligenza artifiziala.
Jau hai en sasez fatg tras tut il svilup en il munda communicaziun. Da la lavur sco tipograf, sur il programmar enfin tar l’agid da l’intelligenza artifiziala.
Oz abita Andrea Matossi a Scuol en la chasa ch’era en possess da sia famiglia. Ina part da quel edifizi ha el dà a fit ad ina famiglia indigena.