Anja Furger - «Sco profi èsi dad esser egoista»

Ils onns tar Lucerna en la Women’s Super League sajan stads fitg intensivs, ma ella haja emprendì ina massa per la vita e pudì far in grond svilup en il ballape ed era sco persuna. Ma sin quest livel saja la concurrenza fitg gronda. I saja da sa dustar ed esser egoist, uschiglio na vegnan ins nagliur, uschia Anja Furger.

Avant bun in onn ha Anja Furger terminà sia carriera ch'ha cumenzà cun 15 onns – l'emprim tar Laax e lura tar Domat avant che sa render en la Bassa e giugar en ligas pli autas. Senza il ballape na vai dentant tuttina betg. Uschia ha ella dà quest onn in comeback tar il Team Surselva ch'ha dumagnà la promoziun da la 4. en la 3. liga.

Impressiuns da la carriera da ballape

Desideri da sa gidar cun il mund

Durant ses engaschi tar il FC Lucerna ha Anja Furger studegià antropologia a Berna. Avant ses studi, nua ch'ella ha tranter auter er emprendì la lingua araba, ha ella frequentà in praticum tar la Direcziun da svilup e da collavuraziun. Quella è cunzunt responsabla per la coordinaziun d’agid umanitar – ina lavur emoziunala e fitg bella, di Anja Furger che vesa sasezza in di en questa branscha. Dapi tschintg onns lavura la Lumneziana er en in pensum parzial tar l’Agid svizzer per la muntogna, quai sco assistenta da la direcziun ed era sco allroundra.

Per scriver sia lavur da master ha Anja Furger lavurà l'onn passà durant intgins mais sin ina plantascha da cacau a Peru, quai per l’Interpresa da tschigulatta svizra Choba Choba.

Plain tensiun per l'Euro da dunnas

Las proximas emnas vegn Anja Furger a persequitar intensivamain il campiunadi europeic da ballape da las dunnas. Duas giadas vegnia ella er ad esser en il stadion. Quest turnier saja impurtant per manar il ballape da dunnas in pass enavant. I dettia anc bler potenzial, è l’anteriura profi ballapedista da Cumbel persvadida.

Podcast Profil

In’ura cun biografias, destins, istorgias ed experientschas da giuven e vegl ch’han da dir u da raquintar insatge.

Ulteriurs audios e podcasts