A Roma èn stadas fullas da glieud, tranter auter er Flurina Cavegn-Tomaschett, la collavuratura pastorala da la plaiv da Glion e conturn. Las fullas eran per ella in grond impediment da chattar la via spirituala. «Atgnamain èsi stà in bel mument, ma cun tanta glieud han ins strusch pudì prender vair il mument ch’ins va tras la porta sontga», di Flurina Cavegn-Tomaschett en l'emissiun Vita e cretta.
Tut in’autra atmosfera eri durant il pelegrinadi che la plaiv da Glion e conturn ha organisà, in pelegrinadi a pè da Glion a Cuira tras la Ruinaulta.
Quai è stà ina bellezza experientscha. Er il motto da l’onn sontg «pelegrins da la speranza» chat jau che nus avain sentì – quai esser sin via communablamain cun il sentiment da speranza.
Flurina Cavegn-Tomaschett spera, che quels radis da speranza ch’èn sortids da Roma, che quels radieschan vinavant noss mund. Da l’autra vart po era tut puspè vegnir pli quiet che durant quest onn particular. «La baselgia na viva betg be da quels muments spezials e sontgs, mabain cunzunt era dal mintgadi.»
In auter partratg è quel da la porta sontga. Tras quella na pon ins betg be entrar. Questa porta maina er anora tar ils carstgauns.
Jau sper che nus hajan il curaschi dad ir ora tar ils carstgauns là nua ch’els dovran nus.
Il proxim onn sontg è il 2033. Lura commemorescha la baselgia catolica 2000 onns dapi la mort e levada da Jesus Cristus.