Armas fascineschan, polariseschan e sveglian dumondas. Ma tgi èn las persunas che possedan pistolas e buis, e tge fascinescha ellas vi da quellas? Jau hai accumpagnà persunas da la scena d'armas, visità in club da pistolas ed ina uniun da tir dinamic. Parallel hai jau testà, quant simpel ch’igl è, da sez survegnir ina pistola.
Il Grischun ed il tir tutgan culturalmain ensemen. Quai sa mussa er a la Festa federala da tir a Cuira cun passa 36'000 participants e participantas. Ma armas fascineschan er ordaifer la chatscha ed ils stans da tir classicas. En il chantun Grischun datti actualmain radund 62'000 armas registradas – teoreticamain posseda pia quasi mintga terza persuna ina arma.
Ma quant simpel èsi da vegnir tar ina pistola u schizunt ina buis semiautomatica? Mia atgna emprova cumenza en la fatschenta d'armas «Waffen Grischun» a Cuira. Jau less cumprar ina Glock 19. Ma uschè simpel n’èsi betg: I dovra in permiss d'acquistar armas. Entant che mia dumonda vegn examinada tar la polizia chantunala, vom jau a la tschertga da las persunas che dovran questas pistolas en lur temp liber.
Meditaziun e defensiun: Club da pistola Cadi
Mia emprima staziun ma maina a Mustér tar il «Club da pistola Cadi». Per Rico, il manader sportiv ed in dals megliers tiradurs da pistola da la Svizra, è il sajettar pura meditaziun:
Per mai è quai in sport per reducir il stress dal di. Jau sun pacifist e na faschess nagin mal ad ina mustga.
Il president Herbert perencunter vesa quai in zic auter. Per el vai sper la fascinaziun per la concentraziun era per la defensiun da la societad en il absolut cas d’urgenza. Dus munds differents en in’uniun. Cura che jau dastg sez sajettar in revolver – la Smith & Wesson Magnum (enconuschenta tranter auter da films sco Dirty Harry) – capita insatge cun mai. Inconscient sa schluita in surrir sin mia fatscha. Jau ma sent sco in cowboy. Igl è ina forza fascinanta che fa medemamain pensar – jau tegn en maun in'arma mortala.
Tar il club da pistola Cadi
-
Bild 1 von 2. En il stan da sajettar. Bildquelle: RTR.
-
Bild 2 von 2. Jau poss sajettar cun in grond revolver. Bildquelle: RTR.
La polizia ed il tir dinamic
Curt temp pli tard survegn jau tar il biro d'armas da la polizia chantunala propi mes permiss d'acquistar armas. Aluis Candinas, schef da la polizia criminala dal Grischun, ma declera ch'ins haja lubì il 2025 radund 800 da questas dumondas – quai èn circa duas armas per di. Quai po dentant er esser ina persuna cun pliras dumondas.
Cun mes permiss en satg vai vinavant tar il «Combat Club Grischun». Qua vegn sajettà a moda dinamica ed or dal moviment. Ils maletgs sin social media paran militars. Ma Aluis Candinas declera:
Uschè ditg che tut ha lieu en il rom reglà strictamain sin la plazza da tir e nagin na sa radicalisescha, èsi in sport renconuschì.
Sentiment da schuldà e trenament da stress
Il «Combat Club Grischun» na po betg trenar en il Grischun, pertge els dovran in stan da sajettar nua ch’els pon sa mover. Ed avair in stan da tir che lubescha il filmar, quai è stà ina sfida. Er qua hai jau sentì la critica visavi las medias e la discreziun. Tut auter il club sez, els èn stads fitg averts per laschar accumpagnar.
Ma tgi èn els propi ? Fanatichers da militar u rambos che giogan guerra? L'instructur Gion snega vehementamain, i giaja primarmain per ina sfida cognitiva. Gion fa ina cumparegliaziun nunusitada: Il trenament al gidia d'analisar la situaziun e da restar quiet en situaziuns da squitsch e stress – sumegliant a la situaziun cun famiglia ed uffants pitschens che cridan e dovran differentas chaussas gist en il medem mument. In nivel da stress che jau sco bab poss tuttavia chapir, era sch'il cuntrast tranter il mintgadi da famiglia e tschalers da tir na pudess betg esser pli absurd.
Cura ch’jau tir en l'equipament tactic e prend enta maun ina buis, svanescha il sentiment da cowboy da Mustér immediat. Jau ma sent plitost sco in schuldà pront per la guerra. Gion sa che questa optica irritescha persunas d'ordaifer:
Ins vesa maletgs en las novitads e collia els fauss. Nus n'essan betg rambos. Nus lain trenar. E gea – in zic cool chattain nus quai natiralmain era. Qua essan nus puspè pitschens mats.
La canera sfratga las ureglias, l'unda da pressiun da l'arma va tras l'entir corp. E puspè ma trapl jau durant in surrir – suandà d'ina nauscha conscienza.
Tar il Combat Club Grischun
-
Bild 1 von 3. Tar il tir dinamic dovri il chau e las chommas. Bildquelle: RTR.
-
Bild 2 von 3. Gion instruescha mai vid la buis. Bildquelle: RTR.
-
Bild 3 von 3. Co èsi da sajettar dinamic? Bildquelle: RTR.
Facit: La Glock 19 resta en la vitrina
Igl è stà ina experientscha tut speziala. Ils commembers dal Club da cumbat na sa preparan betg per ina guerra; els eran plitost preparads per mias dumondas criticas. Cun respostas sin mias dumondas bandun jau il tschaler cun in bun sentiment e chapesch lur fascinaziun per quest sport d'auta prestaziun cognitiva.
Tuttina, mes nov hobi na vegn quai betg ad esser. Jau na dovrel er betg mes permiss da cumprar in’arma, la Glock 19 resta en vitrina. Quai che jau prend dentant cun mai da quest viadi è ina meglra chapientscha per la cultura d'armas grischuna – ina scena fitg passiunada – ch'è dentant era fitg pertscherta da lur image e surtut tge ch'igl dovra per ir enturn correct cun questas armas.