Tge far sch’il mintgadi surdumonda ins? Tensiuns politicas, stress da mintgadi, squitsch – tut crescha ed il bainstar psichic patescha. Na pudess ins betg simplamain delegar tut las dumondas ed ils quitads averts? La vita sco muntg hai jau adina romantisà en mes chau. Igl è procurà per tut, e la via da la vita è relativamain clera.
-
Bild 1 von 4. Insatge che l'autur dal film e Frater Stefan han communabel è la musica. Qua avant ina da las pli grondas orglas da baselgia en Svizra. Bildquelle: RTR.
-
Bild 2 von 4. Bildquelle: RTR.
-
Bild 3 von 4. Il corridor che collia las localitads da la clausura cun la baselgia claustrala. Bildquelle: RTR.
-
Bild 4 von 4. Marcus Petendi, il redactur dal Clic. Bildquelle: RTR.
Claustra sin temp
Tge che la vita en claustra munta dentant propi na saveva jau betg fin ussa. En la claustra benedictina a Mustér hai jau pudì viver trais dis ensemen cun ils muntgs per chattar ora quai. Jau sun stà surprais che jau n’era betg il pli giuven en la chasa.
Ils dis van ditg, forsa è quai il bel en claustra. Ma jau na sai anc betg co ir enturn cun quai.
Tranter 21 fin 91 onns èn represchentadas tut las gruppas da vegliadetgna. En la clausura, il sectur intern da la claustra, n'han dunnas nagin access.
Ora et labora
Tschintg giadas al di sa scuntran ils frars da la claustra per far oraziun cuminaivla. Il rest dal di surpiglian ils blers lavurs en claustra, sco scolasts en il gimnasi affilià u fan lavur pastorala ordaifer la claustra.
In'invista profunda en il mintgadi claustral, en las reglas da l’urden e sche la vita sco muntg vegn propi en dumonda per mai – a questa dumonda sun jau ì suenter en mes Clic.
Or da l'archiv: Avant 10 onns ha er il redactur Dominik Hardegger tschertgà in refugi segir en la claustra benedictina a Mustér – sch'igl è stà il dretg lieu per el è in'autra dumonda.