Dals 31 da fanadur enfin ils 31 d'avust envida la filarmonia da chombra dal Grischun puspè en il chastè a Haldenstein. Suenter 20 onns e 10 ediziuns da l'Opera dal chasté vegn questa stad midà concept. Il Festival en il chastè porscha nov concerts da trais differents geners. La musica d'opera na va betg a perder, ma i vegn vitiers musica da sinfonia cun la novavla sinfonia da Beethoven sco era musica da film.
Accessibel per tuts
Ins veglia porscher insatge nov per era cuntanscher la glieud che n'è betg exnum fan da musica classica. Vul dir: In public pli vast e – surtut grazia a la musica da film – er in public pli giuven. Per far pli accessibel il program dal Festival en il chastè e per reducir retegnientschas datti era quest onn puspè trais sairas cun in public viewing gratuit sin il Kornplatz a Cuira.
Era gnervusitad è avant maun
Cun tut las midadas dal program, il public viewing ed ils custs da circa 1 milliun, sa dumonda Jacqueline Giger Cahannes – sco presidenta da la filarmonia da chombra dal Grischun – sche la glieud vegn d'emplenir la curt dal chastè. Ella è pero da buna speranza ch'il festival en il chastè vegnia in success.
In nov toc da musica per 500 onns Trais Lias
Er ina nova cumposiziun da David Sontòn Caflisch ha chattà plaz en il program dal festival. Quella ha Caflisch cumponì per occasiun da las festivitads 500 onns Trais Lias en l'incumbesa da la filarmonia da chombra dal Grischun. L’idea saja tenor Jacqueline Giger Cahannes naschida en las festivitads a Trun, che la filarmonia da chombra dal Grischun ha pudì accumpagnar.
