Collavurar pli stretg per rinforzar la plazza da teater a Cuira. Quai vulan la Postremise, il Teater Cuira e la Klibühni. Co-inizianta per questa idea è stada la pandemia, quella haja sfurzà ils teaters dad ir novas vias. Ils trais teaters sajan avant in onn cura che la nova direcziun da la Klibühni – Jann Clavadetscher e Ursina Trautmann – era enconuschenta sesids ensemen per discutar co rinforzar la scena da teater.
La pandemia ha sfurzà nus dad ir novas vias
Conclusiun: collavurar pli stretg e coordinar las occurrenzas ed uschia evitar ch'i dettia per exempel collisiuns tar las premieras.
Carta da puncts per ils teaters
In emprim project ord questa collavuraziun è gia sa resultà: la carta da puncts per ils teaters. Quella funcziuna analog ad autras cartas: rimnar puncts ed alura datti insatge gratuit. Concret: tgi che visita quatter occurrenzas en in dals teaters a Cuira, po visitar la 5avla gratuitamain.
Finamira: attrair dapli persunas e procurar per rotaziun tranter ils teater. Gist cun l'entrada gratuita possian ins cuntanscher ch'ina persuna giaja forsa a guardar ina producziun ch'ella avess uschiglio forsa betg visità. Ed era la reclama vincendaivla ch'ils teaters fetschian in per l'auter na dastgian ins betg sutvalitar, uschia Ursina Trautmann la co-directura da la Klibühni.
Che visitadras e visitaders raquintan in a l'auter dals teaters e las producziuns è fitg impurtant per nus
En in onn veglian ins trair bilantscha e decider co continuar cun la carta e forsa schizunt iniziar ulteriurs projects.
