Las acturas ed ils acturs principals ch'èn stads da vesair en las emprimas tschintg episodas da «L'ultim Rumantsch» èn er puspè da vesair en la segunda stafla da la seria rumantscha. En il center stattan vinavant las dispistas da la famiglia Cadonau ch'è la possesura e gestiunaria da la pli gronda chasa da medias en il Grischun.
Las lavurs da filmar per la segunda stafla «L'ultim Rumantsch» han cumenzà il november 2024 e duran fin la fin da l'onn. Publitgada vegn ella il november 2025. Las suandantas persunas giogan rollas:
Annina Hunziker sco Ladina Cadonau
Annina Hunziker (*1993) è creschida si a Laax e Cuira. Ella ha studegià en il bachelor scienza da teater e film a las universitads da Berna e da Turitg, avant che far il studi d'actura al seminari da Max Reinhardt a Vienna. Durant ses studi d'actura ha ella giugà en producziuns al Wiener Burgtheater.
Dapi ch'Annina ha fatg ses diplom l’onn 2021, sa preschenta ella en diversas producziuns da teater en Germania, en l’Austria ed en Svizra. Durant la stagiun 2021/2022 ha ella dà ses debut al teater da Düsseldorf. Là vesan ins Annina Hunziker en duas producziuns.
Marietta Jemmi sco Andrietta Cadonau, mamma da Ladina e sora da Gion
Marietta Jemmi (*1967) è creschida si a Flem ed ha studegià scolasta primara a Samedan ed a Cuira. Dapi lura sa senta ella linguisticamain da chasa en sursilvan ed en vallader. La scolaziun sco actura ha ella fatg a Turitg ed a Berlin. Marietta Jemmi ha cooperà en diversas producziuns da film e da teater. L’actura e pledadra viva a Turitg.
Marco Luca Castelli sco Gion Durisch, maina l'imperi da medias «Medias Grischunas»
Marco Luca Castelli (*1971) è naschì a Cuira ed è creschì si biling cun tudestg e talian. El ha studegià in pèr semesters filosofia, scienza da politica e teater a l'Universitad Humboldt a Berlin. Lura ha el midà a l'Universitad Folkwang dals arts ad Essen, nua ch'el ha terminà l'onn 2000 ses studi d'actur. Dapi lura èn suandads numerus engaschaments en differents teaters, en gruppas libras e sin sets da film en la regiun da lingua tudestga. Dapi 2007 maina Marco Luca Castelli era reschia ed ha inscenà classichers da tribuna sco er tocs contemporans.
Noam Jenal sco Corsin Cavegn, anteriur schefredactur da «Posta»
Noam Jenal (*1996) è creschì si a Turitg. A chasa ha el discurrì rumantsch ed ebraic. Gia baud ha Jenal scuvrì ses plaschair per il fatg d’acturs. Uschia na fai betg surstar, ch'el è gia stà cun tschintg onns avant la camera per in film da televisiun cun Christian Kohlmund e Stefan Gubser.
Cun 19 onns è el partì per Londra ed ha cumenzà a studegiar a la London Academy of Music and dramatic Art teater (Schauspiel). Oz viva Noam Jenal a Basilea. El lavura sco actur ed en la gastronomia, ina cumbinaziun che plaschia fitg bain.
Da vesair en ulteriuras rollas:
- Norbert Jenal sco Donat
- Tim Theus sco Xeno
- Gina Estrada sco Thelma
- Andreetta Nogler sco Frida Bonifazi
- Alessia Toutsch sco Shpresa
- Felicitas Heyerick sco Regina
- Josef Willi sco Danuser
- Catriona Guggenbühl sco dunna Brunner
- Ursin Derungs sco Franz
- Esther Berther sco Silvia
- Sandro Derungs sco Cla
- Oceana Galmarini sco Maria
- Annina Sedlacek sco Gianna
- Nikolaus Schmid sco Jenni
- Roman Weishaupt sco Caprez
- Elmar Deflorin sco Gion-Peder Durisch
