Corina Schmed ha ina finamira ambiziusa: Ella vul esser l’emprima dunna svizra che noda cun be ina fladada passa 159 meters sut l’aua. In'idea ch'è naschida spontanamain, be paucs mais suenter ch’ella ha per casualitad scuvert sia passiun per il sfunsar liber.
Corina vul documentar quest viadi e perquai accumpogna Paula Nay adina puspè ella cun la camera. Spertamain vegn cler, che questa aventura metta sin il tgau il mintgadi da Corina.
Jau hai vulì savair quant lunsch ch’jau vegn, sch'jau trenesch vinavant. Per il record mancan anc bun 50 meters.
Senza gronda savida cumenza ella a trenar intensivamain, ensemen cun ses partenari e coach Nicolas. Ella tschertga però adina puspè sustegn professiunal – era tar il sportist extrem austriac, Christian Redl, ch’ha sez gia mess si 11 records mundials.
Quai è in project fitg ambizius. Jau crai che quai n’è anc mai vegnì fatg en uschè in curt temp. 160 meters n’èn betg insatge che blers umans cuntanschan.
In viadi als cunfins mentals e corporals
Cun bandunar sia zona da confort e crair vi da sia idea fa Corina bain spertamain progress. Quel n'è però betg cuntinuant e Corina vegn a ses cunfins corporals, però era mentals. I cumenza in act da ballantscha tranter il chau ed il corp. Per dumagnar il record sto Corina numnadamain nudar sut l’aua durant duas minutas e mez senza trair flad. Quai funcziunescha però be sch'ella vegn en il «flow».
Sin quest viadi senta Corina spertamain, ch’i va per dapli che be per rumper il record.
Suenter duas minutas cumenza mia detta a sfurmiclar e lura vegn quai mument: be anc in zic, be anc in zic...e sche ti manchentas quest mument da vegnir ensi, èsi memia tard.
I va per curaschi, per la confidenza en sasezza, però era per la realisaziun che la pli dira sfunsada è magari quella en l’agen intern.
Controllar l’instinct da surviver
Il sfunsar liber dovra dasper la fitness corporala er in'enorma forza mentala, pertge ch'il corp signalisescha trasora ch’el vul trair flad. Vegnir dad ir enturn cun quest reflex da surviver è perquai essenzial. Quai pon ins però trenar, tranter auter era cun tecnicas da trair flad che gidan da sa calmar ed era cun exercizis da tegnair il flad.
Essenzial è ch’ins vegn da relaxar en questa situaziun ch’è atgnamain stress pur. Qua gidan patratgs positivs, dubis e patratgs negativs custan percunter energia ed uschia er oxigen. Il reflex da trair flad na pon ins però betg trenar «davent». En il meglier cas gida il trenament da prolungar il temp fin che quel s'annunzia ed ins sa disa da tegnair ora questa situaziun malempernaivla. Qua cumenza la controlla mentala.
A las concurrenzas – per il record uffizial
Sis mais suenter che Corina è sa messa sin ses viadi, vul ella ir per il record uffizial. Perquai cumenza ella a sa participar a concurrenzas, er internaziunalas – in'experientscha nua ch'i s'avra in nov mund cun cleras reglas e nua ch'i sa mussa era co Corina vegn dad ir enturn cun il squitsch.
-
Bild 1 von 4. Il countdown avant la partenza. Duas minutas avant la partenza cumenza il countdown. Cura che quel è a fin, hai num «Official Top». Aifer las proximas 10 secundas sto Corina partir, uschiglio vegn ella disqualifitgada. Bildquelle: mad.
-
Bild 2 von 4. L'ultima fladada. Avant che sfunsar en l'aua, expirescha Corina tut ses flad dal tuttafatg per prender in'ultima fladada uschè profunda e cumplaina sco pussaivel. Bildquelle: RTR.
-
Bild 3 von 4. La segirezza . Era durant la concurrenza sa nodan adina pliras persunas (safeties) cun Corina a la surfatscha. En il cas d'in «blackout» ston ellas reagir. Bildquelle: mad.
-
Bild 4 von 4. Il protocol. Per che la sfunsada saja valaivla sto Corina vegnir ord l'aua, prender davent il clip dal nas ed ils egliers, lura anc mussar e dir ch'ella saja ok. Bildquelle: RTR.
Tar il sfunsar liber datti pliras disciplinas: nudar cun duas nudaglias, ina nudaglia (monofin) u era senza nudaglias. La basa per tut quellas è però la disciplina da static. Qua vai per star uschè ditg sco pussaivel cun il chau ed il corp sut l'aua, senza sa muventar.
Blers na collian il sfunsar liber betg exnum cun las disciplinas en il pool, mabain plitost cun il sfunsar en la profunditad u en la natira cun la boia e la suga.
Sfunsar liber en la profunditad
Sin ses viadi va era Corina adina puspè a sfunsar liber en la profunditad. En Svizra è quai savens en lais – en las vacanzas il pli gugent en las cenotas (sistems da taunas cun aua dultscha) a Mexico.
-
Bild 1 von 4. En la profunditad para il temp da star airi. Bildquelle: mess a disposiziun.
-
Bild 2 von 4. Tgi che sfunsa liber po scuvrir in mund tut aparti. Bildquelle: mess a disposiziun.
-
Bild 3 von 4. Tar il sfunsar liber en la profunditad chatta Corina la quietezza. Bildquelle: mess a disposiziun.
-
Bild 4 von 4. Las cenotas mexicanas – sistems da taunas d'aua frestga – porschan ina grondiusa culissa per sfunsar liber. Bildquelle: mess a disposiziun.
Tar il sfunsar en la profunditad vai dasper la controlla mentala surtut per il vegnir a frida cun il squitsch da l'aua che crescha pli profund ch'ins sfunsa. Ina sfida è surtut il vegnir dad equilibrar il squitsch en las ureglias. En grondas profunditads vegn quai numnadamain pli e pli grev perquai che l'aria en il lom vegn cumprimida.
Il mument ch'jau sfuns en la profunditad para il temp da star airi, tut è quiet ed jau sent savens ina ferma colliaziun cun mamezza.
En quests muments da quietezza en la natira vegn Corina era puspè da tancar energia suenter ils trenaments intensivs en il pool e las concurrenzas.
Or da l'archiv: