La religiun gioga en general ina rolla centrala en la retorica politica dals Stadis Unids. Nagin discurs uffizial recli senza Dieu e senza la fin «God save America». Tuttina – sut l'administraziun actuala paran ils tuns religius da vegnir anc pli dad auts ed anc pli gizs.
Vita e cretta discurra cun l'experta Claudia Franziska Brühwiler davart il cunfin tranter tradiziun e fanatissem religius e tge rolla che la persunalitad dal president gioga en quest connex.
La professuressa per pensar politic e cultura da l'America (Professor of American Political Thought and Culture) è a l'Universitad da Son Gagl. Da ses viadis e studis enconuscha ella la vita e politica en ils Stadis Unids profundamain, e commentescha quella regularmain per medias en la Svizra ed en l'exteriur.
Cruschadas en il 21avel tschientaner: ina dumonda da la mesira
La retorica da guerra actuala da la Chasa alva cuntegna dapli che mo tacs da religiun. L'uschenumnà minister da guerra (pli baud era quai il minister da defaisa) Pete Hegseth smanatscha cun cruschadas medievalas, cun guerra da cristians cunter muslims. Dal tuttafatg nov na saja il motiv da la cruschada dentant betg, di la professuressa da Son Gagl.
Gia durant la guerra fraida è la missiun dals Stadis Unids cunter il communissem vegnida armada en la communicaziun cun tratgs sumegliants a cruschadas. Ma l'epoca actuala para da surpassar tut.
Dentant essan nus ussa en il 21avel tschientaner – en in'epoca nua che la retorica politica è quasi, sco che l'Englais di «on steroids», vul dir nua che tut è simplamain anc pli extrem, anc pli giz.
Igl è in svilup che evochescha dumondas, surtut en il context d'in minister da guerra che cloma ad ina cruschada. Brühwiler accentuescha ch'i va qua surtut per ina «question of degree» – ina mesira che haja cuntanschì ina nova dimensiun tar intgins acturs en la Chasa alva.
Il president e ses ministers: ina cumbinaziun ineguala
Er sch’il minister da guerra dat en egl cun sia retorica canerusa, è la pussanza effectiva tar il president sco «Commander in Chief» e quel nizzegia sia pussanza er en decisiuns da persunal. La relaziun dal president tar ses collavuraturs e sias collavuraturas pli fidaivlas è marcada d'in tschert pragmatissem.
Ultimamain è il president sa spartì da sia ministra da giustia, Pam Bondi, e da sia scheffa da la segirtad interna, Kristi Noem. Gia il 2025 era l'actualmain pli ritg uman dal mund, Elon Musk, ina giada «best buddy» da Trump, svanì or da l’administraziun americana.
Tenor Claudia Franziska Brühwiler pudessi tgunsch esser ch’er il minister da guerra actual, Hegseth, vegn ad udir proximamain ils pleds famus «you’re fired»:
Hegseth na tutga betg tar quella part da l'administraziun, che sesa il pli ferm en sella.
Actualmain resta la dumonda schebain il decurs da la guerra u facturs externs pudessan manar ad ina reorientaziun averta. Il dachasa spiritual da Hegseth pudess dentant daventar in'ipoteca.
Las ragischs dal cristianissem gizs da Hegseth èn da chattar bain en il spectrum evangelical american. Là dentant en in chantun fitg spezial che propaghescha structuras patriarcalas, vul unir baselgia e stadi ed etablir ina teocrazia – dimena in’ideologia ch'è er per tradiziunalists cristians extrema.
Ma cler è: la loialitad en la Chasa alva è in bain fragila.
Cura ch'il papa daventa in adversari: cunfins da la provocaziun
Actualmain stattan dentant anc auters disgusts en l’attenziun internaziunala. Betg propi blers amis ha il president american sa fatg cun attatgar il papa Leo XIV. Quel aveva numnadamain crititgà cleramain il diever da la religiun per giustifitgar la violenza en guerra, specificamain en quella cunter l’Iran.
Fertant ch’il president emprova cun plaina forza da bittar ieli en il fieu, resta il papa fidaivel a sia lingia e n’ha evidentamain nagin interess dad ina debatta da quest gener. Per Claudia Franziska Brühwiler na sa tracta qua betg d'in conflict, sco quai ch'ella declera:
La noziun «conflict» insinuass che l'autra vart cumbattia er. Ma tar la baselgia catolica na vegn betg cumbattì, là vegn simplamain prendì ina clera posiziun. Il papa na sa lascha betg en sin ina guerra da social media u insatge sumegliant. Quai fiss indign.
La baselgia catolica, uschia Brühwiler, sa mussia sco in’adversaria che na sa lascha betg impressiunar uschè svelt e che mussia al president ses cunfins. Igl è ina lecziun davart il fatg ch’ins duess tscherner sias battaglias da maniera sabia – ina savida che para mintgatant da mancar en la Chasa alva.