Tar las dumondas filosoficas da nossa seria da stad raschuna Annina Arpagaus Tomaschett da quai che gida a dar senn a sia vita.
Esser en pasch cun sasez
Cun 22 onns ha ella dumagnà il titel da tiradura dal Grischun 2022. Igl onn 2024 è ella vegnida campiunessa Svizra en la disciplina 10 meters cun buis d’aria cumprimida. Medaglias e trofeas èn sa rimnadas durant ils davos tschintg onns sco atleta da professiun.
Il fatg che Gianin creschiva en mai dat a questa medaglia ina muntada speziala.
Ina muntada fitg emoziunala ha per la treganta professiunala la medaglia da bronz ch'ella ha gudagnà als campiunadis d'Europa da tir en Frantscha la stad 2025. La suletta persuna che saveva da quel temp che ella purtava in uffant sut ses cor era ses partenari Flurin. Lur secret communabel e lur amur haja dà fitg bler anim e forza als campiunadis en Frantscha.
Gianin ha mussà a mai che miraclas èn pussaivlas.
Gianin Carli è naschì la primavaira 2026. «El ha midà nossa vita, e tuttina pudain nus far tut cun el. El è in uffant patgific, quai simplifitgescha tut», conceda la mamma da 26 onns. Grazia a la naschientscha da Gianin craja ella en miraclas e che mintga persuna ha ses anghel pertgirader persunal.
Impressiuns d'ina treganta professiunala
-
Bild 1 von 4. Annina cun sia collega americana Mary Trucker. Cuppa mundiala da tir a Bhopal en l'India 2023. Bildquelle: Mess a disposiziun.
-
Bild 2 von 4. ISSF Cuppa Mundiala a Bhopal en l'India 2023. Annina en cumplaina concentraziun – qua cun caliber pitschen. Bildquelle: Mess a disposiziun.
-
Bild 3 von 4. ISSF Cuppa mundiala 2023 a Lima en il Peru. Annina: «Senza mia formaziun professiunala en il sport da tir, na fiss jau probabel mai stada en il Peru u en l'India.». Bildquelle: Mess a disposiziun.
-
Bild 4 von 4. ISSF Cuppa mundiala a Miami en Florida. Annina en acziun cun sia buis d'aria sin 50 meters distanza. Bildquelle: Mess a disposiziun.
Che Annina po persequitar vinavant sia carriera sco atleta professiunala en il sport da tir, possia ella engraziar al sustegn da sia famiglia e da ses um Flurin. «Senza mia famiglia na fiss i betg pussaivel da manar questa vita,» sincerescha Annina. Passentar temp cun ses chars dattan forza ad ella. La forza essenziala dettia ad ella dentant il fatg da esser en pasch cun sasezza.
Avant ina concurrenza stoss jau passentar temp a chasa cun mia famiglia.
Viagiar en la natira e passentar temp cun sia famiglia è essenzial per Annina. L'avust tutgan ils zains da nozzas per Annina e ses um Flurin Arpagaus.