Per l’emprima giada en sia anc giuvna carriera ha Annina Tomaschett (24 onns) pudì sa participar ad ina concurrenza internaziunala da tir da l’elita. A quest campiunadi europeic a Châteauroux, bun trais uras en il sid da Paris, ha la tiradura da Trun astgà sajettar cun las meglras tiraduras da l’Europa ed uschia pudì rimnar in mantun experientscha ed emprender ina massa. In campiunadi d’Europa cun l’elita saja anc ina giada tut auter, bler pli grond ed intensiv che tut ils auters turniers, uschia Tomaschett. Perquai saja ella er vegnida fitg gnervusa ed i haja duvrà tut per restar ruassaivla per uschia sa concentrar sin la lavur, sin il sajettar.
Bler saja ì fitg bain a quest campiunadi d’Europa, ma i fissi er stà pussibel dapli. La medaglia da bronz ch’i ha dà cun l’equipa svizra mussa dentant ch’Annina Tomaschett è sin la dretga via. Quest campiunadi dettia uss in enorm stausch da motivaziun ed il siemi saja da pudair sa participar ina giada a gieus olimpics, lezs sajan il non plus ultra di la Sursilvana. Ils proxims gieus olimpics èn il 2028 a Los Angeles.
Medaglia da bronz a la premiera dad Annina Tomaschett
La sonda dals 26-07-2025 è Annina Tomaschett stada per l'emprima giada en il stan da tir dals campiunadis europeics a Châteauroux en Frantscha. La tiradura da Trun è cunzunt sa qualifitgada per la concurrenza roiala en il stan da sajettar nua ch'igl è da sajettar mintgamai 20 sajets sin pes, en schanuglias ed en venter. Tar questa concurrenza na datti nagin magazin, mintga sajet sto vegnir chargià singul.
Medaglia da bronz a sia premiera
Tar sia premiera a campiunadis internaziunals è Annina Tomaschett daventada 29avla da total 68 atletas. Per sa qualifitgar per il final n'hai betg bastà. Ina medaglia datti dentant sco equipa: Ensemen cun Chiara Leone e Franziska Stark ha Annina Tomaschett cuntanschì il terz plaz en la valitaziun da team e survegn cun quai ina medaglia da bronz.
Dasper la concurrenza en trais posiziuns è Annina Tomaschett era vegnida selecziunada per la concurrenza da team. Ensemen cun Jan Lochbihler ha l'atleta da 24 onns cuntanschì in 8avel rang final. Ina medaglia d'argient hai perencunter dà per ses collegas Chiara Leone e Christoph Dürr.
Ultimas preperaziuns a Trun
Ils dis avant ils campiunadis è ella turnada en sia patria a Trun per sa preparar sin l'occurrenza. RTR ha inscuntrà l'atleta per in'ultima intervista.
RTR: Vus pudais per l'emprima giada participar sco sportista d'elita als campiunadis europeics da tir sin 50 meters – tge sentiment è quai?
Annina Tomaschett: Il mument sun jau anc quieta ed emprov da tegnair a bass la gnervusitad. Ma quella vegn lura schon pli datiers ch'ils campiunadis vegnan.
Ils 25 da fanadur sajettais Vus per l'emprima giada als campiunadis, co vesan ils dis avant a chasa anc ora?
Qua a chasa hai jau la pussaivladad da far liber – sch'jau vi ir a sajettar, sai jau far quai. Probabel vegn jau schon anc ad ir ina duas giadas. Suenter èsi lura da sa metter en l'auto ed ir a Châteauroux.
Il mument sun jau anc quieta ed emprov da tegnair a bass la gnervusitad. Ma quella vegn lura schon pli datiers ch'ils campiunadis vegnan
En Frantscha sajettais Vus en ina equipa cun bleras persunas enconuschentas. Per exempel Nina Christen u Chiara Leone – duas olimpionicas cun medaglias d'aur. Tge fa quai cun Vus ed èsi grond squitsch u plitost motivaziun?
Igl è omadus. En in tschert senn squitsch – sch'jau sun en ina gruppa cun ellas sai jau ch'jau hai era da vegnir cun mia prestaziun. Ma da tschella vart èsi era in’euforia: in dastgar emprender dad ellas e pudair lavurar ensemen cun ellas. Quai è insatge ch’ins na sa betg far mintga di.
Tge finamira avais Vus per la participaziun en la concurrenza roiala?
Jau vi far mia lavur e mia procedura ch’jau hai adina durant il sajettar uschè precis sco pussaivel per suenter pudair dir ch'jau hai fatg tut il pussaivel, tut quai che ha duì e pudì capitar è capità.
Co ston ins metter avant quella procedura?
Nus sajettain en trais posiziuns en tut 60 sajets: 20 en schanuglias, 20 en venter e 20 sin pe. Mintga sajet ston ins chargiar da nov e là tranteren poi esser ch'ins perda la posiziun. Per che quai na capitia betg han ins ina procedura ch'ins sto resguardar u sto era esser flexibel da midar quella.
Vus stuais tegnair la concentraziun era sche insatge na va betg tenor plan. Tge strategia avais?
En il mender cas èsi da metter giu la buis e segirar quella, ir ora e baterlar cun il trenader per chattar ensemen ina schliaziun. En dus chattan ins il pli ina meglra e pli sperta via da turnar.
Per restar en il ritmus ston ins empruvar da betg perder la posiziun. Sche quai succeda èsi da chattar ina soluziun co vinavant. En il mender cas stun jau si e vom or dal stan per discurrer cun il trenader.
Quai vul dir ch'ins ha avunda temp per interrumper tranteren?
I dat ina limita da temp. Per quels 60 sajets avain nus temp in'ura e mez. Cunquai ch'jau sun ina tiradura svelta n'hai jau anc mai gì gronds problems da temp. Uschia hai jau patgific pudì ir ora e far pausas e baterlar, u era betg far quellas e suenter in'ura sun jau a fin.
Vus sajettais en trais posiziuns – pertge quella categoria? Na fissi betg pli simpel da sajettar en be ina da quellas trais?
Na, jau ma poss concentrar meglier sch'jau stoss midar la posiziun. Jau hai quels 20 sajets, quai è ina perioda fitg curta ch'jau hai da ma concentrar. Suenter mid jau posiziun e ma concentresch sin in'autra posiziun. Cura ch'jau mid la posiziun stoss jau sa concentrar sin las dumondas tge diopter met jau sin mia buis, tge met jau uschiglio lasura u tge pais hai jau nua. Quai avra mes focus e fa liber el, e suenter sai jau puspè serrar el e sa concentrar. A mai gida quai fitg.
Ina chaussa da concentraziun, savair ir enturn cun squitsch – tut chaussas che Vus emprendais. Pia naginas grondas surpresas ch'i po dar?
I po schon dar surpresas e sch'i dat ina ch'ins n'ha anc mai gì èsi da superar la situaziun. Ins sto chattar or da quella e cun las experientschas ch'ins ha cun ils onns ch'ins sajetta e fa schon quai chattan ins forsa ina schliaziun. Ma sch'ins na chatta nagina ston ins simplamain fidar sin quai ch'ins fa ed ir tras.
Datti in portafortuna?
Gea, vi da mia serradira hai jau in corn d'in taur. Quel ha mes frar mess si e tegna mai.
In sguard enavant: essas Vus suenter ils campiunadis europeics, speranza cun in bun resultat, forsa prest als campiunadis mundials u a l'olimpiada?
Ina participaziun per ils campiunadis mundials u sch'jau vegn en dumonda per la cuppa mundiala vegn pir ora suenter ils campiunadis europeics. La gronda finamira è naturalmain il 2028 ils gieus olimpics da stad a Los Angeles en ils Stadis Unis da l'America.
Fatg il discurs cun Annina Tomaschett ha Reto Pfister.
Or da l'archiv: