632,9 puncts – quai è il nov record svizzer sur la distanza da 10 meters che la giuvna tiradura sursilvana ha realisà la davosa fin d’emna. Quest record ha ella cuntanschì cun 57 culps perfetgs, vul dir sajets cun 10,2 puncts e dapli. Anc mai aveva ina tiradura u in tiradur svizzer sajettà in uschè aut resultat en questa disciplina cun 60 sajets sin pes.
Jau hai realisà ch’i saja in nov record svizzer pir cura che mes trenader ha gratulà a mai.
Fin oz tegneva Nina Christen il record svizzer. L’onn 2020 aveva la tiradura dal chantun Sutsilvania, ch’ha gudagnà l’onn passà aur e bronz als gieus olimpics a Tokio, sajettà en questa disciplina 632,1 puncts. Uss ha Annina Tomaschett meglierà quest record svizzer per 0,8 puncts.
Duas giadas plazza 5
Il nov record svizzer ha Annina Tomaschett cuntanschì en la qualificaziun. En il final cun las meglras otg tiraduras e tiradurs è Annina Tomaschett la finala vegnida 5avla. A Pforzheim ha ella er cuntanschì sco suletta Svizra il final cun il caliber pitschen. Er en questa disciplina è Tomaschett daventada 5avla.