Dapi intgins onns collavura RTR cun studentas e students dal studi «Multimedia production» da la FHGR. Il 2025 ha in'emprima gruppa da trais studentas e students lavurà ensemen cun RTR vi d'ina nova seria da video cun il num «Tgeggsch?»
Suenter las emissiuns da pilot han lura las duas studentas Melinda e Moena realisà ils emprims cuntegns per il nov format «LinQuatsch». Uschia è naschida ina seria da videos davart las atgnadads da la lingua rumantscha e davart las sfidas che sa preschentan sch'i manca ina lingua communabla.
- Melinda Widmer
- Moena Bischoff
Ils videos n'èn dentant betg mo per persunas che san rumantsch, mabain per tut quels e quellas che s'interesseschan per nossa lingua u che vulan simplamain udir e giudair la lingua rumantscha.
Tge idiom è il pli ... ?
En l'emprima stafla dal format datti tranter auter ina chadaina da telefon, nua che persunas che na discurran betg rumantsch emprovan da transmetter in pled d'ina persuna rumantscha a l'autra. Ultra da quai datti er in «ranking» dals idioms rumantschs.
Guarda uss tut las episodas da «LinQuatsch»
Tge idiom è il pli bel, il pli nausch u il pli legher. En las episodas dus fin quatter giuditgescha ina persuna betg-rumantscha ils differents idioms tenor differentas categorias.
Ina dumonda che pudess da princip divider la Rumantschia sa sviluppa plitost ad ina egliada sin ils pleds ils pli interessants e caracteristics dals differents idioms.
Dissegnar cun instrucziuns rumantschas
En las episodas set fin nov emprovan persunas rumantschas da declerar a persunas che na discurran betg rumantsch co dissegnar in maletg. In'incumbensa che sa mussa dad esser pli difficila che spetgà.
«LinQuatsch» mussa a moda impressiunanta quant essenziala che la lingua è per la communicaziun – ed, a medem temp, era quant savens che nus chapin in l'auter, schizunt senza ina lingua communabla.