Durant trais emnas han trais studentas e students da la Scola auta spezialisada dal Grischun dastgà producir agens videos tar RTR. Questa collavuraziun è naschida en il rom da lur studi da multimedia production ch'els absolvan a Cuira.
Durant lur practicum han Lisa Strebel, Stephanie Römer e Moritz Kappeler concepì e producì videos da divertiment davart la lingua rumantscha. Quant chapeschan persunas da lingua tudestga sch'i vegn discurrì cun ellas mo pli rumantsch? E quant nizzaivel è il franzos en scola u il spagnol emprendì a chasa?
- Lisa Strebel
- Stephanie Römer
- Moritz Kappeler
Ils videos na sa drizzan dentant betg mo a persunas che discurran rumantsch, mabain a tut quellas e quels ch'han interess per linguas u simplamain gust da sa divertir.
«Talpa»
En l'emprim video emprovan trais betg-rumantschs da revelar la «talpa» or d'ina gruppa da tschintg persunas. Ina persuna na sa numnadamain insumma betg rumantsch, mabain imitescha mo la lingua.
Quai è in video sumegliant al format englais gia enconuschent «Find the mole». Vegn la talpa demascrada?
«Yoga»
Chapir rumantsch senza discurrer la lingua è la sfida era tar la segunda incumbensa. Ina persuna dat en rumantsch instrucziuns per in exercizi da yoga e la segunda persuna fa tge ch'ella chapescha, u almain manegia da chapir.
Uschia daventan ils simpels exercizis ina gronda sfida cun in grond privel per malchapientschas.
«Pictur dal glindesdi»
Co statti cun las persunas che discurran rumantsch? Gida lur lingua materna a chapir autras linguas rumantschas sco franzos u portugais?
En quests videos ston las participantas ed ils participants dissegnar noziuns ch'els survegnan en ina lingua estra.
Tut ils videos dal «Pictur dal glindesdi»
Pon els sa fidar da lur enconuschientschas linguisticas u vegnan els forsa carmalads sin ina faussa via da lur rumantsch?