«Igl è stà in sentiment fitg curius da stuair far la valischa per adina. Questa giada betg per far vacanzas en Svizra, mabain per turnar a chasa», di Livio Niedermann. RTR ha guardà enavos cun il giuven da 24 onns ch'è gist returnà da Roma.
Livio Niedermann sa regorda, che durant ses emprendissadi da commerzi tar l’Institut d'assicuranza sociala dal chantun Grischun IAS, studegiava el tge via professiunala che pudess esser la sia suenter ses emprendissadi.
Dus terzs dal temp d’emprendissadi ha Livio Niedermann absolvì durant il temp da pandemia. Quai ha dà temp e flad per prender decisiuns al giuven da 20 onns. Per far il pass tar la polizia saja el stà memia giuven. Uschia ha el absolvì emprim la scola da recrut tar l’armada svizra.
Jau n'hai mai siemià da daventar gardist a Roma.
Durant la recruta han dus gardists da Roma referì davart las pussaivladads ed avantatgs per il futur ch'il servetsch tar la Guardia svizra a Roma porscha. Quest inscunter cun ils gardists da Roma ha laschà fastizs tar il giuven da Domat. El è s’interessà, ha constatà ch'el adempliva tut las pretensiun.
El è s’annunzià cun success. Il prim da settember 2022 ha Livio Niedermann cumenzà la scolaziun per daventar part dal corp da la Guardia svizra en il Vatican a Roma.
Tar la scolaziun da gardist tutgan era las lecziuns da talian. «Uss discurra jau meglier talian che rumantsch», declera Livio. Prest è il giuven gardist stà partì en sco guardia per proteger il papa. Tranter auter eri era sia obligaziun da vegliar e far guardia davant l'abitaziun da papa Francestg. Otg uras en roda. Quai saja in lung temp cura ch'ins è sulet, ma quai faschevia el gugent.
Papa Francestg avevi in bun umor ed i capitavi bain savens ch'il papa avriva la porta da sia abitaziun per far ina sgnocca cun ils gardists. «L’emprima giada ch'il papa ha discurrì cun mai en in corridor, na sun jau betg vegnì ora cun in tun», sa regorda Livio Niedermann riend. Cun il temp saja ina curta conversaziun cun il «santo Padre» stada normal.
Ina damaun marvegl a las tschintg, ha el avert la porta ed offrì a mai in glatsch.
Tar papa Francestg ha Livio Niedermann gì in fil spezial. «El è stà mes fil cotschen durant mes temp a Roma, ses pleds port'jau vinavant en mes cor», di el pensiv. Gliendisdi Pasca, il di da la mort da «ses papa» ha el pudì accumpognar e proteger papa Francestg en il vasché per la davosa giada sin ses viadi tar la plazza dal Vatican.
Muments istorics per Livio Niedermann
-
Bild 1 von 10. Livio Niedermann ha fatg ses engirament per rumantsch. Ils 6 da matg 2023 è il giuven gardist da Domat vegnì saramentà. Bildquelle: Vatican Media.
-
Bild 2 von 10. Sco guardia a la festa da Bavania, ils 6 da schaner 2025. «Las festas tranter Nadal e Bavania visitan fitg bleras persunas il Vatican, quai è fitg bel da pudair pertgirar il papa. Bildquelle: Vatican Media.
-
Bild 3 von 10. Livio Niedermann ha fatg part da la «Banda del Vaticano». Gia dapi blers onns è Livio in passiunà schumbrader e commember dals Tamburs da Domat. Bildquelle: Vatican Media.
-
Bild 4 von 10. In maletg simbolic par la Guardia svizra. Livio Niedermann a mez la ritscha da gardists en uniforma da «Gran-Gala». Bildquelle: Vatican Media.
-
Bild 5 von 10. L'emprim inscunter cun il nov papa. La saira dals 8 da matg 2025 suenter l'elecziun da papa Leo, ha Livio Niedermann fatg guardia davant la stgala che porta tar la stanza dal papa. Bildquelle: Vatican Media.
-
Bild 6 von 10. La davosa audienza tar Papa Leo avant che turnar a chasa. «Tar la davosa audienza tar il papa, avant che turnar a chasa hai jau supplitgà el da firmar mes tricot dal club da ballape Lazio Roma. Il papa è fan dal AS Roma», di Livio Niedermann. Bildquelle: Vatian Media.
-
Bild 7 von 10. Cumià da papa Leo il 14avel. Tar la audienza da cumià dals 15 da november 2025 ha Livio Niedermann surdà in «Röteli» e papa Leo ha firmà il tricot dal club da ballape Lazio Roma. Bildquelle: Vatican Media.
-
Bild 8 von 10. Il cumià da la cumpagnia dals giuvens gardists. Sco regal da cumià han ils cumpogns gardists surdà a Livio Niedermann in tricot dal club da ballape Lazio Roma. Bildquelle: Vatican Media.
-
Bild 9 von 10. Livio Niedermann da return a Domat: «Jau sun partiì per Roma sco uffant e sun turnà sco um.» Uss vul Livio daventar policist. Bildquelle: RTR.
-
Bild 10 von 10. Livio Niedermann daventa nov Major dals Tamburs da Domat: «Quest post è ina vaira onur per mai. Era perquai che jau sun stà davent passa trais onns». Bildquelle: RTR.
En l'emissiun «Profil» raschuna Livio Niedermann da sias experientschas durant ses temp sco gardist ma era dal nov vent che papa Leo il 14avel ha purtà en il Vatican. L'onn proxim cumenza il giuven da 24 onns ina prescolaziun tar la Polizia da la citad da Cuira cun perspectivas sin la scolaziun professiunala che cumenza l'onn 2027.
Il temp a Roma è stà ina vaira scola da la vita. Jau cussegl a mintga giuven da far ina tala experientscha.
La vita da Livio Niedermann n'è dentant betg mo lavur e disciplina. En ses temp liber tgira el amicizias, ses hobis sco dar sin il tambur u far bagordas.