Per Luis Coray è tut art. La vita, performanzas, pictura e musica – tut va in en l’auter, tut viva el cun ardur ed energia. «Envidar la chandaila endadens» saia impurtant, di el en il film dal cineast Casper Nicca. E questa energia, quest gust da far art è lura era il fil cotschen dal film. Il film accumpogna l'artist grischun tar sias ragischs artisticas en la Toscana, nua ch'el visita ils lieus nua ch'el ha cumenzà seriusamain cun la pictura.
Ma en il film visita Luis Coray era lieus en il Grischun ch'èn impurtants per el. Laax, nua ch'el è creschì si, Cuira nua ch'el ha ses atelier ubain Segl-Maria nua ch'el dat curs da malegiar per uffants. Ed adina vai per percepziun, per il sguard spezial cun quel che l'artist multifar vesa ed interpretescha il mund.
Luis Coray en ina collavuraziun cun Elisabeth Sulser
En la collavuraziun cun la sinesteticra Elisabath Sulser va Luis Coray a la tschertga da la percepziun da colurs, furmas e tuns. Elisabeth Sulser ha scizzà la cumposiziun «Try The Magic Carpet» da Timber A. Hemprich. Luis Coray ha interpretà la scizza sin la taila gronda. Quels maletgs ha Luis Coray alura exponi en la baselgia da Tusan durant che il chor «Coramor» sut la bitgeta da Corina Barandun Gertschen ha chantà la cumposiziun.
Luis Coray, il pictur
Per il pictur Luis Coray èn las colurs il pli impurtant. El lavura savens cun colurs intensivas, pastusas dad ieli ed acryl.
Galleria da purtrets
-
Bild 1 von 3. Cruna da jarva Sontga Margriata, 2023. Bildquelle: Luis Coray.
-
Bild 2 von 3. 2014. Bildquelle: Luis Coray.
-
Bild 3 von 3. Roma Lag Tiert, 2014. Bildquelle: Luis Coray.
Sia ovra è vegnida preschentada en la monografia «Munds»
Luis Coray, il musicist
Cun Sendas Oranscha ha Luis Coray gia ils onns 80 preschentà ses hit. Ed ina part da ses art è la musica restada. In exempel è la collavuraziun cun Pascal Gamboni, cun il Top Pop Rumantsch Sen Baun.