(sursilvan) Anflar cuntentientscha ei il tema dil «Pled sin via» dad oz. Per explicar «cuntentientscha» prendel jeu in exempel ord mia veta. Miu bab era in um fetg cuntent. La cuntentientscha vegneva profund ord siu cor, glischava ord ses bials egls e sederasava sin si’entira fatscha e cumparsa. Ils davos onns da sia veta sesevan nus bia sil baun avon casa e tschintschavan e seregurdavan. El era schi cuntents, oravontut perquei ch’el era en pasch cun sesez e cun siu contuorn. Las sentupadas cun carstgauns, dar ina paterlada e guder il mument – quei valeva bia per el. La lavur sil bein puril a Cumadé ha dau ad el satisfacziun e senn. El era plein engraziament che siu fegl ha surpriu il bein ed aschia mirau per la continuaziun. Ei deva buc in auter liug, nua ch’el havess viviu pli bugen.
Quella pintga investa ella veta da miu car bab cuntegn ils pli impurtonts attributs dalla cuntentientscha: far pasch cun sesez e cun il contuorn, guder il contact cun autras persunas, veser e schazegiar quei che nus vein, dar ed anflar senn all’atgna veta ed esser engrazieivels.
Far pasch cun sesez e cun il contuorn, guder il contact cun autras persunas, veser e schazegiar quei che nus vein, dar ed anflar senn all’atgna veta ed esser engrazieivels.
Cun tut las opziuns e pusseivladads ozildi eis ei nuota aschi sempel dad esser cuntents. Ei para a mi che bia carstgauns ein semper alla tscherca. Biars cuoran atras la veta – buc perquei ch’els ston, mobein perquei ch’els han il sentiment da stuer far part e gie buca muncantar zatgei. Las medias socialas, reclamas e la televisiun suggereschan di per di che nus essan buc avunda – buca bials ni bialas avunda, che nus havein buc avunda success e daners e che nus duvrein exact aunc quei program da fitness, da prender giu ni in training per optimar sesez per anflar nies cletg. Nus survegnin l’impressiun che cuntentientscha seigi d’anflar mo ordeifer da nus e che nus seigien dependents dad auters. In svilup che fa patertgar.
La buna nova ei: Nus vein mintgadi danovamein la pusseivladad da bandunar la roda dil raspun e da prender decisiuns ch’ein en favur da nus e nossa cuntentientscha interna. E daco buca gia entscheiver oz a seser dapli sil baun avon casa?
