Il pli gugent chanta Maria Catrina Albin-Caduff en il ravugl da «La Compagnia Rossini»: «Là ma sent jau purtada da mia segunda famiglia», declera la figlia pli giuvna da la famiglia Caduff a Plaun Danis. Il chant e la musica èn vegnids mess ad ella en tgina da sia mumma Lisabet e da ses bab Armin Caduff. Il giavisch da daventar ina primadonna dal belcanto n'haja ella dentant mai sentì.
Forsa è mia modestadad in frain, ma quai sun jau e jau na vi betg esser autra.
Muments cun Maria Catrina
-
Bild 1 von 7. In sguard en la partitura per evitar confusiun. Maria Catrina consultescha moviments ed acziuns cun ses frar Flurin Caduff che maina la reschia dal musical «Plaun Salter». Bildquelle: RTR.
-
Bild 2 von 7. A Danis, durant ina emprova da teater cun ils uffants. La primavaira dal 2024 han las provas cun ils uffants cumenzà. Bildquelle: RTR.
-
Bild 3 von 7. Maria Catrina : «Lavurar cun uffants fa plaschair. Gia tar il musical Frisal Frisal dal 2022 aveva Maria Catrina instruì il chor d'uffants. Qua cun ils chauns dal «Eremit» ina persuna centrala dal musical. Bildquelle: RTR.
-
Bild 4 von 7. Maria Catrina durant concert da la Cumpignia Rossini. «Il pli gugent chant' jau en il ravugl da La Compignia Rossini, là am sent jau da chasa». Bildquelle: La Comapagnia Rossini.
-
Bild 5 von 7. Dumengias e luverdis, la famiglia Caduff lavura maun en maun. Armin Caduff autur e cumponist dal musical rumantsch suna clavazin da las emprovas. Lisabet Caduff sustegna sia figlia nua ch'igl è pussaivel. Bildquelle: RTR.
-
Bild 6 von 7. Ina roschada dal chor d'uffants «Plaun Salter». Tar ils musicals dad Armin Caduff daventan ils uffants ina unica famiglia sin tribuna ed er el temp liber. Bildquelle: RTR.
-
Bild 7 von 7. Bellas regurdientschas dal musical «Frisal Frisal» 2022. Prest tut ils uffants che han lavurà tar «Frisal Frisal» cun la famiglia Caduff, èn era quest onn da la partida. Bildquelle: Fam. Caduff.
Sco mattina ha ella savens accumpagnà ils geniturs a concerts e galas da la Cumpagnia Rossini. Uschia è ella creschida si en in ambient da concerts, projects ed agendas plainas. La vita sin bleras tribunas en Svizra mo er en l'exteriur tutgan tar sia vita. «Jau hai gì il privilegi d'avair questa vita senza stuair cumbatter per ella. Mes geniturs han fullà via per mai», sincerescha Maria Catrina. Ella se regordia anc bain dal temp dal chor d'uffants da «La Compagnia Rossini», ella chantavi alt e quai era bun uschia per ella. Oz è Maria Catrina Albin-Caduff sopranista ed ina impurtanta part da l'interpresa artistica da sia famiglia «La Compagnia Rossini».
Maria Catrina Albin-Caduff ha fatg il studi da magistra da scola secundara. Da temp a temp fa ella substituziuns. Malgrà il plaschair da lavurar cun persunas giuvnas è dar scola tar ses «plan b». Tar ses pensums dal cor tutgan ses um Erwin e lur dus uffants Mattiu e Mena Maria ma era tut la famiglia Caduff cun bab e mamma e ses dus frars Flurin ed Ursin.
Cun maridar mai, ha mes um Erwin era maridà mia famiglia.
En il musical «Plaun Salter» en trais generaziuns dals Caduff sin tribuna. Ils pli giuvens èn Mattiu e Mena Maria, ils uffants da Maria Catrina ed Erwin. «Mes bab ha scrit per scadin participant e participanta ina rolla sin mesira, quai ha el era fatg per mes uffants», declara la mamma da 44 onns. Maria Catrina gioga la rolla da «Lady Wilson» en il musical. Ina interprendidra da Londra cun caracter patgific.
I dat bleras parallelas da caracter tranter Lady Wilson e mai, nus vulain omaduas pasch ed armonia.
Las lavurs da marketing, organisaziun e finanzas han cumenzà per Maria Catrina gia avant prest dus onns. Ella lavura maun en maun cun sia mamma Lisabet. «Jau crai che nagin telefonescha uschè bler cun la mamma sco jau. Senza ses pareri na decid jau nagut». Intensiva è sia lavur era cun ses frar Flurin Caduff che gioga l'«Eremit» e chanta tar il musical che ha ils quatter d'october premiera. En l'emissiun «Profil» da RTR ans raquinta Maria Catrina dal travasch en chasa Caduff cun tants chaus creativs, ma era nua ch'ella chatta parallelas da ses caracter natiral e quel da la figura «Lady Wilson» ch'ella gioga en il nov musical rumantsch «Plaun Salter».
Or da l'archiv: