Gia tschintg onns èn passads dapi che l'ensemble vocal Incantanti ha edì il disc cumpact «Concertare – Turnea da concurrenza». Nairas uras per realisar in nov portatun. Quel porta il titel «Da flura tier flur'» ed il chor da giuvenils ha registrà las chanzuns en la baselgia refurmada d'Andeer. Danovamain mussa il nov disc il chant prezius e variant da las giuvnas e dals giuvens che Christian Klucker dirigia gia passa 20 onns.
«En leghers turnighels la tschitta saltava da flura tier flur' e cun quellas formava maletgs da colurs en bellezia cumpleina» – quai è ina passascha da la poesia «Tschitta saltunza» d'Arnold Spescha e quella ha dà il titel al portatun. Sco la tschitta che sgola da flur a flur «sgola» l'ensemble vocal da chanzun a chanzun, dal popular al sacral, dal divertent al pensiv, dal rumantsch ad autras linguas.
Las chanzuns popularas rumantschas èn en divers idioms, ed il sutsilvan na dastga natiralmain betg mancar. Vitiers datti er novas chanzuns rumantschas sco per exempel «Sin in'orva dil parvis» da Flavio Bundi u «Tschitta saltunza» da Marten Janssen.
Incantanti en la rait
L'Artg musical preschenta il disc e discurra era cun il dirigent Christian Klucker davart las registraziuns e projects per l'avegnir da l'ensemble vocal Incantanti.
