Artg musical - Follaton a Rudolstadt

Il festival da musica mundiala e tradiziunala a Rudolstadt en la Turingia è sta per la 33avla giada. In eveniment da tradiziuns cun var 100’000 visitadras e visitaders, cun 130 concerts da band ed artistas da tut il mund: polcas da la Finlanda, tarantellas da la Calabria, blues da la Sahara, chant viril da la Georgia e montferrines da la regiun dal Lac Leman e da la Savoia. Quels tuns èn vegnids da «Follaton», il trio da Losanna che ha represchentà la Svizra e che ha savì persvader cun in grondius concert.

Il public è sta impressiunà ed a la fin hai dà in grond applaus per Léonie Bugnon (ghitarra), Ella Vérant (violina) e Nikita Pfister (arpet ed orgels da maun).

Gia tar lur arriv han els vesì che l’organisaziun è professiunala. Per el, che n’enconuscheva betg quest festival da Rudolstadt, è quai stà ina fitg bella experientscha ed ina revelaziun.

«Follaton»: En la tradiziun da las Alps francofonas (Artg dal Léman, Chablais, Valais, Val d'Aosta) è il «Follaton» ina creatira fantastica, in furbaz che fa filistuccas e lumparias: el auza la rassa da las mattas, sterna tschendra en la schuppa, mangia il chaschiel... ma sch'ins ri da sias baschattas e fa per el ina cuppa cun fritgs setgs, gida el a pulir la stalla e fa servetschs pli pitschens...

«Follaton» è er il num d'in ensemble musical che sa deditgescha a la reanimaziun da la musica da la tradiziun da la Svizra franzosa, interpretond ella da nov s’orientond a la musica acustica.  Ina da las particularitads è in saut che sa numna: Montferrine.

Ina da las spezialitads da la regiun dal Lac Léman è la montferrine, che deriva da la regiun piemuntaisa Montferrat e che é er parainta cun la tarantella siciliana. La montferrine è er tipica en la Savoia ed en il Valais – pero main enconuschenta en il rest da la Svizra. I da las medemas melodias, pero quellas vegnan sunadas cun in ritmus different.

Impressiuns dal festival a Rudolstadt

«Follaton» creescha ses repertori da manuscrits, registraziuns veglias e da collecziuns da notas sco quellas dad Albert Gos u dad Otto Held. Vitiers vegnan chanzuns dal repertori tradiziunal e cumposiziuns novas da tut la Svizra romanda. «Follaton» interpretescha da nov er melodias e chanzuns, da la Scozia, da l’Irlanda – e natiralmain la musica alpina da la Svizra, Italia, Savoia. E Nikita Pfister, musicant e cumponist fa er retschertgas, prova da scuvrir melodias veglias.

Avant 200 onns devi paucas notas, perquai na san ins betg precis co cha quels sauts vegnivan interpretads. A man da manuscrits vegls prova el da dar nova vita a quels tocs.

Podcast Artg musical

L’Artg musical è in caleidoscop da tut quai che capita en la scena da musica en Svizra rumantscha, en il Grischun e sur ils cunfins da quel ora. Tadlai las pli novas registraziuns dad RTR, intervistas cun cumponists ed interprets e las istorgias da davant e davos ils palcs da concert.

Ulteriurs audios e podcasts