Atgnamain è Pasca la festa la pli veglia e la pli impurtanta dal cristianissem. Enturn Pasca datti bia ritus ed usits che vegnan celebrads cun devoziun e pumpa. Pasca vegn festivà pli fitg che la passiun. En il mund da la musica è quai dentant gist il cuntrari. I dat massa ovras che tractan la passiun, il pitir e murir da Jesus Cristus. Las ovras che sa fatschentan dentant cun la levada da mort en vita da Cristus èn survesaivlas.
Ovras per Pasca
Trais da questas ovras vegnan preschentadas en l'Artg musical: «Die Auferstehung des Erlösers» (Ein musikalisches Gedicht) e «Der Gottmensch jauchzt» (Kantate zum Osterfest) èn ovras da Johann Friedrich Agricola.
Per sia cantata «Der Gottmensch jauchzt» ha el prendì ord la bibla il psalm 21. L’ovra cumenza cun in chor festiv ed in register grond d’instruments da suflar.
La terz'ovra è l'oratori da Pasca «Frohlocket und preiset» da Gottfried August Homilius.
Homilius ha gì in grond dun da cumponer musica sacrala. En tut ha el creà passa 180 cantatas, 10 oratoris da la passiun, in’oratori da Nadal ed in oratori da Pasca. «Frohlocket und preiset den göttlichen Held» uschia chanta il chor per l’avertura e l'orchester cun clarinas e paucas furman in’atmosfera festiva e plaschaivla.
L'Artg musical per Pasca porta dentant era bleras chanzuns rumantschas da laud per la dumengia da festa.
Conta laud – chanta lod
Il 1976 han sur Gieri Cadruvi ed il cumponist Gion Antoni Derungs edì ina platta (LP) cun il titel «Conta laud – Chanta lod» che cuntegna chanzuns spiritualas e musica sacrala dals Retoromans. Questas chanzuns vegnan preschentadas dal Quartet Engiadinais sut la direcziun dal reverenda Gion Gaudenz, dal Chor dils Larischs sut la direcziun da Marcus Zarn sco era dal Quartet dubel grischun – viril e maschadà – che vegn dirigì da Gion Antoni Derungs. El è era l'interpret d'intginas cumposiziuns per orgla da baselgia.
