Sper il premi sco victur ha Simon Gabriel er gudagnà il premi dal publicum ed il premi spezial da la band accumpagnanta – pia da la brass band ch'accumpogna ils solists durant il final. Quel è dal rest vegnì surdà da la Brass Band Friburg ch'è stada sut la direcziun da Robin Bartholini, l'anteriur dirigent da la Brass Band Cazis.
Simon Gabriel è creschì si e stat a S-chanf. Gia sco uffant ha el cumenzà a sunar trumbetta e cornet. Entant vala el bunamain sco in star en la scena da brass, dentant er en general en la scena da musica instrumentala. El ha pudì festivar numerus success tar bleras concurrenzas. Er sco solist è el fitg dumandà. Actualmain è el «principal cornetist» – quasi il schef d'orchester – da la Grischun Brass e la Liberty Brass Band Svizra Orientala. Il chantun Grischun ha onurà el il 2026 cun il premi da promoziun.
Cumplettà quai ch'è avant trais onns betg gartegià
Las bleras persunas survegnan be ina giada la schanza da sa participar a la Concurrenza europeica da solists. Per Simon Gabriel èsi gia la segunda giada. Avant trais onns è el vegnì nominà sco candidat svizzer. El ha lura er sa qualifitgà per il final – cun 14 onns. A la fin èsi stà in terz plaz – ed il premi dal public.
RTR aveva accumpagnà el tar quella concurrenza avant trais onns a Malmö en Svezia. En ils cuntrasts «Passiun per il plech» raquinta il giuven davart la musica e tge che quella munta per el.