L'Uniun chantunala da chant dal Grischun datti dapi il 1852. Dapi lura è capità ina massa en il mund dals chors grischuns. Era radund 175 onns pli tard, en in mund che funcziuna cumplettamain auter, pon ins dentant discurrer d'ina scena viva e preschenta.
Ils basegns da nossa societad n'èn betg exact ils medems sco quels d'ina giada.
Era sche nossa societad funcziunia baingea in pau auter che pli baud, possian ins tenor il copresident da l'uniun Gian-Reto Trepp anc adina discurrer d'ina scena activa. Per mantegnair era vinavant il chant da chor en il Grischun hajan ils chors da mussar avertezza e flexibilitad. I saja impurtant ch'ils chors ch'existan gia daditg sa delibereschan da structuras fixas che na sajan forsa betg pli uschè adattadas al temp actual. I valia la paina da s'avrir e tut tenor era da trair vi chantaduras e chantadurs externs per in u l'auter project.
Intgins chors grischuns en acziun
Aut nivel tar giuvenils – tuttina manca la glieud giuvna
Malgrà da varsaquants buns chors d'uffants e giuvenils saja grev da gudagnar glieud giuvna per ils chors da creschids.
Nus empruvain adina puspè da far purschidas attractivas – era per glieud tranter 20 e 40 onns. Tuttina datti pauca participaziun ord questa gruppa da vegliadetgna.
Tenor l'Uniun chantunala da chant dal Grischun n'haja quest fenomen betg propi da far cun il chant sez, mabain plitost cun il svilup da nossa societad. Sa liar e daventar part d'in'uniun na saja per blera glieud giuvna betg emprima prioritad.
