In paucs dis datti ina terza ediziun dal Festival da la chanzun rumantscha. Suenter Trun (2019) e Zuoz (2022) questa giada a Vella in Val Lumnezia. Ina da las miras da l'Uniun chanzun rumantscha: intimar a cumponistas e cumponists da scriver novas chanzuns rumantschas per chor.
Realisà vegn quai en il rom d'ina concurrenza da cumposiziun. Quest onn èn vegnidas inoltradas 45 novas chanzuns per chor. I sa tracta qua da chanzun per chor maschadà, chor viril, chor d'uffants e chor da dunnas.
Memia pauca visibilitad
Era gia durant ils dus festivals passads eran vegnidas inoltradas passa 80 chanzuns. Mo intginas singulas han dentant chattà la via tar ils chors grischuns.
Ils dus giasts da l'«Artg musical»
-
Bild 1 von 2. Andrea Schmed. dirigenta «Chor mischedau Surrein». Bildquelle: RTR.
-
Bild 2 von 2. Duri Janett. dirigent «Cor masdà Ftan». Bildquelle: RTR.
Il dirigent dal «Cor masdà Ftan» Duri Janett sco era la dirigenta dal «Chor mischedau Surrein», Andrea Schmed han persequità cun grond interess las duas ultimas ediziuns dal festival.
Ensemen cun els ha l'«Artg musical» provà dad eruir pertge che las chanzuns ch'èn naschidas a chaschun dals dus festivals passads n'èn betg propi sa deresadas en il mund dals chors dal Grischun.
Las chanzuns che n'han betg fatg premis duessan tenor mai vegnir fatgas pli visiblas ed accessiblas.
Tenor la dirigenta Andrea Schmed èn las chanzuns che n'èn betg vegnidas premiadas memia pauc visiblas. Uschia n'hajan las dirigentas ed ils dirigents dals chors betg propi la survista davart l'entira paletta da chanzuns ch'èn vegnidas cumponidas.
Las chanzuns da l'ultim festival che haja gì lieu a Zuoz sajan baingea da chattar sin la pagina d'internet da l'Uniun chanzun rumantscha. Quellas da l'emprim'ediziun a Trun che n'èn betg pli da chattar en la rait, sajan dentant sco sparidas.
Jau sun in miserabel pianist. Perquai fatsch jau gugent diever da versiuns auditivas per survegnir in'empreschiun d'ina chanzun nova.
Per il dirigent Duri Janett fissi supplementarmain era d'avantag d'avair versiuns auditivas da tut las chanzuns novas. Uschè pudess vegnir fatg in meglier maletg da las cumposiziuns.
Chanzuns victuras per chor maschadà
Memia pretensius
La gronda part da las chanzuns saja tenor Andrea Schmed plitost pretensiusa ed uschia na sa tracti betg da chanzuns ch'ins prendia simplamain uschè en in program da concert.
Bleras da las chanzuns victuras èn chanzuns da patg che pretendan blera lavur e perseveranza.
Ina da las premissas per pudair tscherner ina chanzun saja per Duri Janett era la part emoziunala. Tar cumposiziuns novas vegnian per part tschertgadas novas vias ed armonias che procuran per ina distanza tar interpretas ed ils auditurs. Quai possia lura era esser in motiv per betg tscherner ina chanzun nova.
Causa lur armonias plitost estras han tschertas chanzuns novas fadia da chattar la via enfin en il miz dal cor.
Trun e Zuoz: las ediziuns dal passà
