Festival chanzun rumantscha - Organisaturs tiran ina bilantscha positiva

Il president da l'uniun chantun rumantscha, Clau Scherrer, sa mussa cuntent suenter il terz Festival da la chanzun rumantscha. Ses facit musical è fitg positiv, ed i saja gartegià da preschentar in program ferm.

Var 1'500 persunas han visità il festival a Vella – ulteriuras 1'000 hajan persequità l'occurrenza via livestream da RTR. Il festival saja stà accumpagnà da blera lavur, dentant er bler optimissem. Surtut impressiunà haja ad el che bleras persunas èn s'engaschadas fermamain per ch'il festival reusseschia. E gia uss sa legra Clau Scherrer sin la proxima ediziun dal festival: Quella vegn ad esser il 2028 en la Val Schons.

Concurrenza da cumposiziun

La concurrenza da cumposiziun è in dals puncts culminants dal festival. Per questa ediziun han 21 cumponists e sis cumponistas inoltrà nova litteratura da chor. Sper las categorias d'enfin uss: chor d'uffants, chor maschadà e chor viril – datti da nov legraivlamain er ina categoria per chor da dunnas.

Chor viril

In chor ad hoc ha preschentà las chanzuns novas: chanzuns per chor viril, chor maschadà e chor da dunnas.

Chor da dunnas

Chor maschadà

Il chor d'uffants da Sumvitg ensemen cun la scola da chant da la Scola da musica Surselva han preschentà las chanzuns per chor d'uffants.

Chor d'uffants

Quest onn hai per l'emprima giada er dà victorias dublas, vul dir che tant la giuria sco er il public ha elegì ina chanzun sin l'emprima plazza. Reussì è quai a David Lang, Cyrill Schürch e Flavio Bundi.

Premi dal public

Vuschs da cumponists

Impressiuns da la fin d'emna

Il venderdi

Cun dus concerts ha cumenzà a Vella il terz Festival da la chanzun rumantscha. Il chor da scolaras e scolars da las scolas da Castrisch, Duin, Glion, Lumnezia, Rueun e Ruschein han avert il festival cun preschentar il nov cudesch da chant per las 5 e 6avlas classas primaras «Canzuns e poesias».

Uffants e giuvenils

Ils texts èn dals uffants e la musica latiers ha scrit la band Silberbüx. Scolaras e scolars han inchantà ina halla fullanada.

Martina Linn e Mattiu

Pli tard la saira han la chantautura engiadinaisa Martina Linn ed il chantautur sursilvan Mattiu dà in concert.

Skyline Walkers

K!ss Me

Avant ch'els dus èn vegnids sin la tribuna èn duas bands da rock da la Scola da musica Surselva, K!ss Me e Skyline Walkers sa preschentads ed han mussà ch'els han gust da chantar chanzuns rumantschas per exempel da Curdin Brugger u Pascal Gamboni u era covers internaziunals en lingua rumantscha.

La sonda

Sco gia a Zuoz il 2022 hai er dà a Vella ina purschida per famiglias. Flavia Walder ed il chor d'uffants han preschentà l'avantmezdi modas e manieras co ins sa e po chantar en famiglia, co ins po animar ed avair plaschair da chantar en il ravugl da la famiglia.

Il suentermezdi ha gi lieu la concurrenza da cumposiziuns. En las quatter categorias chor d'uffants, chor maschedà, chor da dunnas e chor viril ha la giuria tschertga mintgamai las trais chanzuns favoritas. Quellas en vegnidas preschentadas pils uffants da la scola da musica Surselva e dil chor d'uffants Sumvitg e per las ulteriuras furmaziuns dil chor da festival che sa cumponiva dil Cantus Firmus cun rinforzament da ulteriuras chantaduras ed chantadurs.

Tar il public ha danovamain la grevezza da las cumposiziuns procura per discussiuns. Per blers e bleras en las novas cumposiziuns memia pretensiusas per in simpel chor dil vitg

Chanzun dal festival

A posta per il festival ha Ruedi Lutz scrit ina chanzun dal festival: «Gis da maina murir». Il text è da Claudio Spescha. Durant in'emprova da chant publica da la chanzun ha Claudio Spescha declerà co el è vegnì sin quest text.

Durant in'emprim inscunter tranter el e Ruedi Lutz hajan els discutà tgè ch'occupa els gist lura, quai è stà curt suenter la catastrofa a Blatten. Sin fundament da quai hajan els lura ponderar la situaziun da la populaziun er en auters lieus da crudadas da crappa e bovas sco per exempel a Brinzauls, Lostallo u er Bondo.

Claudio Spescha ha lura fatg in text che duai appellar a la solidaritad en tals temps da disgrazia e catastrofa. Il resultat è ina bellezia chanzun che vegn er preschentada durant la concurrenza da las chanzuns.

Improvisaziuns cun Ruedi Lutz

L’organist e pianist, dirigent, cumponist e pedagog da musica ha accumpagnà e delectà al festival da la chanzun rumantscha. Sco dirigent da la chanzun dal festival ubain cun intermezzos durant la rangaziun. Cun improvisaziun sin chanzuns popularas e chavazzins proponì da Clau Scherrer ha el demussà sias abilitads ed animà il public da chantar communablamain.

Dario Hess e la musica giuvenila Surselva

L’ultim punct da program da la sonda saira era il concert dal tuatschin Dario Hess cun sia band ed ensemen cun la musica giuvenila Surselva. Ina cumbinaziun che ha tratg in vast public en l’aula a Vella. Ils arranschaments per quest concert ha il dirigent Remo Derungs fatg a posta per il festival.

Artg musical

Sco «amuse-buche» hai dà la dumengia, ils 28 da settember in Artg musical nua che la redactura Braida Janett ha discurrì cun Duri Janett (dirigent Cor masdà Ftan) ed Andrea Schmed (dirigenta Chor mischedau Surrein) davart la muntada da las novas chanzuns per ils chors da la Rumantschia.

Per cumplettar l'entira rapportaziun dal festival datti la dumengia ils 12 d'october (a las 09:00 uras) in Artg musical cun Clau Scherrer, il president da l'Uniun chanzun rumantscha ed il responsabel per la concurrenza da chanzuns, Giusep Giuanin Decurtins. Els discutan tranter auter da la dumonda tge che capita uss cun tut quellas novas chanzuns.

Las chanzuns victuras

Las chanzuns victuras sco era tuttas chanzuns novas stattan a disposiziun a tuttas e tuts via la pagina da l'Uniun chanzun rumantscha. Là pon ins guardar las chanzuns e sch'ina dirigenta u in dirigent vul la chanzun per ses chor lura sto el u ella dumandar il dretg da la cumponista u dal cumponist. Fin uss èn mintgamai las novas chanzuns per il festival stadas a disposiziun fin il proxim festival. Uss vul l'uniun chanzun rumantscha publitgar e metter a disposiziun tuttas 132 chanzuns ch'i ha dà fin uss als trais festivals da la chanzun rumantscha.

La dumengia

Sco finiziun dal festival è stà en ilcenter la chanzun sacrala. Iso Albin ha referì davart la «Consolaziun de l'olma devoziusa». Quest cudesch da chanzuns sacralas è stà en diever durant passa 250 onns en la liturgia catolica da la Surselva ed ha gì betg main che 12 ediziuns.

A fin è il terz Festival da la chanzun rumantscha cun in concert en la baselgia da Pleif/Vella. L’ensemble Schweizer Vokalconsort, dirigì da Marco Amherd, ha interpretà melodias da la Consolaziun e preschentà ulteriuras ovras.

Resonanza

Sut quest titel ha la Fundaziun da cultura Lumnezia realisà in'exposiziun tematica deditgada al svilup dal chant rumantsch. Ella sa chatta en la Casa d'Angel a Lumbrein e porscha impressiuns auditivas, visualas e sensitivas da la multifara cultura musicala rumantscha. Persunas interessadas pon visitar l'exposiziun da gievgia fin dumengia mintgamai il suentermezdi. L'exposiziun è anc averta fin ils 10 da schaner 2026.

Podcast Artg musical

L’Artg musical è in caleidoscop da tut quai che capita en la scena da musica en Svizra rumantscha, en il Grischun e sur ils cunfins da quel ora. Tadlai las pli novas registraziuns dad RTR, intervistas cun cumponists ed interprets e las istorgias da davant e davos ils palcs da concert.

Ulteriurs audios e podcasts

Podcast Noss chors

En noss archiv da musica èn da chattar nundumbraivlas registraziuns da chors - en spezial chors rumantschs e grischuns.

Ulteriurs audios e podcasts