Siglir tar il cuntegn

Header

video
Ina collavuraziun tranter duas linguas - Männerchor und Frauenchor
Or da RTR Social dals 24.07.2022.
laschar ir. Durada: 8 minutas 5 Secundas.
cuntegn

#cunVus e #perVus al festival Il festival a Degen è gia puspè passà

Bler sulegl ha procurà per ina bella finiziun dal festival a Degen. Tut ils visitaders e las visitadras pon giudair vinavant las reminiscenzas cun las memorias che rtr.ch porscha.

video
Super-dumondas da bunura cun Lukas
Or da RTR Social dals 22.07.2022.
laschar ir. Durada: 3 minutas 29 Secundas.
audio
Da l’Open Air Lumnezia a cumprar en il Volg a Vella
ord Actualitad dals 23.07.2022.
laschar ir. Durada: 3 minutas 47 Secundas.

Quai è stà live da Degen

Quest liveticker da rtr.ch lascha reviver ils trais dis da l’Open Air Lumnezia 2022. Cun sa muventar plinengiu dovri magari pazienza, fin ch’ils proxims posts vegnan chargiads.

Il ticker è a fin

  • 1:10

    Nus schain adia

    Dis da bellezza, chaliras, urizis, bleras bellas emoziuns, duas interrupziuns da la forza electrica e duas giadas turnà en funcziun – l’Open Air Lumnezia 2022 ha purschì in pau dal tut e chala a la fin dals quints positiv.

    Public en l'emprima retscha avant tribuna.
    Legenda: Il public ha giudì ils concerts e la bun'atmosfera dal festival. RTR, Dominic
  • 0:58

    L’energia è definitiv enavos

    Il grond act final, la band Biffy Clyro da la Scozia è finalmain puspè sin il palc e quai cun blera energia!

    Il ghitarist e chantadur da la gruppa Biffy Clyro sin tribuna.
    Legenda: L'energia è turnada cun Biffy Clyro e Simon Neil. RTR, Dominic Pohle
  • 0:21

    I tuna da soundcheck

    Las glischs tar nus en il container glischan puspè – e da la tribuna èn era d’udir las ghitarras da Biffy Clyro. Sco i para pon els propi anc manar tras lur concert.

  • 0:03

    Davos las culissas vegn lavurà fitg

    Il comité d’organisaziun ha gist annunzià ch’ins haja stuì tschentar giu l’electricitad sin tribuna gronda per stabilisar la rait. Parallel èn els vi da bajegiar enturn la tribuna, per che l’act final Biffy Clyro possia anc sunar.

  • 23:48

    Puspè nagina electricitad

    Lo & Leduc èn turnads sin tribuna – han dentant suenter curt stuì rumper giu lur concert ord motivs da segirtad. Uss è la forza electrica puspè interrutta sin l’entir areal dal festival.

  • 23:26

    Nagin tun vers la fin dal concert

    Tuttenina n’han ins betg pli udì ils dus bernais Lo & Leduc. Tge ch’il problem è na san ins anc betg. Enstagl da la band chanta ussa il public.

  • 23:24

    Lukas ed Elias sentan il puls dal festival

    Noss moderatur Elias ed il responsabel per social media Lukas han discurrì davart ils ultims trais intensivs e divertents dis a Degen.

    audio
    Discurs tranter Lukas ed Elias
    ord Actualitad dals 23.07.2022.
    laschar ir. Durada: 2 minutas 59 Secundas.
  • 23:12

    Lo & Leduc sin tribuna

    Cun novas chanzuns e baininqual da lur hits persvadan Lo & Leduc sin tribuna gronda da l’Open Air Lumnezia. L’areal è fullanà e la glieud è ord chadaina. Sco pitschna surpraisa per vus emettain vinavant, ed uschia il concert entir ed entratg.

    Lo & Leduc sin tribuna durant lur concert.
    Legenda: Dus Bernais fan festa en il Grischun: Lo & Leduc. RTR, Dominic Pohle
  • 22:17

    Retschas plainas avant tribuna

    Il public ha chattà la via sin l’areal da concert e prendì cun els buna luna e blera energia per ils concerts finals.

    Il public avant tribuna durant in concert la saira.
    Legenda: L’areal da l’Open Air Lumnezia è plain fin l’ultim plaz. RTR, Dominic Pohle
  • 21:45

    NullSiatNov hala detg

    Sco proxim èn Lo & Leduc sin tribuna. Avant quatter onns avain nus fatg cun els la versiun rumantscha da lur grond hit 079. En quest artitgel chattais era il text rumantsch per tgi che vul chantar questa versiun durant lur concert ...

  • 20:34

    Fin uss funcziuna puspè tut

    Cun excepziun da l’aura funcziuna puspè tut. Ils concerts han stuì vegnir spustads enavos per insaquantas minutas. Sco proxim suonda il rapper tudestg Alligatoah.

  • 19:43

    Il terz di cun Elias Tsoutsaios

    Avant che surpigliar l’emissiun da radio ha noss moderatur anc recapitulà il suentermezdi e fatg in sguard enavant sin il program da questa saira. Cun Bastian Baker, Alligatoah, Lo & Leduc e sco punct culminant cun la gruppa Biffy Clyro.

    audio
    Elias Tsoutsaios surpiglia l'emissiun live da l'OAL
    ord Actualitad dals 23.07.2022.
    laschar ir. Durada: 4 minutas 12 Secundas.
  • 19:23

    L’electricitad e la musica èn puspè enavos

    Bunas novitads per tuts che spetgan vi dal radio sin l’emissiun: Nus emettain puspè live ord la rulotta. Bastian Baker ha cumenzà cun ses concert. Deplorablamain per il vast public avant tribuna è era la plievgia turnada.

    Bastian Baker durant ses concert a Degen.
    Legenda: Nagina situaziun simpla per Bastian Baker ch'avess gì concert 5 minutas suenter la panna d’electricitad. RTR, Dominic Pohle
  • 19:07

    Il public na sa lascha betg disturbar

    Nagina electricitad, in uradi, chametgs e tuns – ma las visitadras ed ils visitaders na sa laschan betg decuraschar e spetgan avant tribuna per il proxim concert.

    Public avant la tribuna a Degen.
    Legenda: Il public spetga nunperturbà avant tribuna sin il proxim concert. RTR, Dominic Pohle
  • 18:57

    L’electricitad curra puspè

    L’agregat d’urgenza è mess en funcziun e collià. Plaunet curra l’electricitad puspè ed ils emprims sistems van puspè en funcziun.

    La baseliga da Sogn Bistgaun.
    Legenda: L'electricitad è puspè turnada. RTR, Dominic Pohle
  • 18:44

    L’entira regiun senza electric

    Sco i para n'ha l’entira Lumnezia per il mument nagina forza electrica. Era davos las culissas ha il stop d’electricitad consequenzas. Qua èn las pumpas da las tendas da VIP crudadas ora, uschia che la tenda è sballunada.

    La tenda da VIP ch'è dada ensemen,
    Legenda: La tenda da VIP è dada ensemen curt suenter che l'electricitad è crudada ora. RTR, Dominic Pohle
  • 18:30

    I vegn lavurà mordio davos las culissas

    Gidanters e gidantras dattan tut per che l’electricitad curra puspè.

    Gidanters vid drizzar en lingias d'electric.
    Legenda: Gidantras e gidanters collian l'agregat d'electricitad. RTR, Dominic Pohle
  • 18:13

    Per tge es ti enconuschents?

    Nus essan ids sin l’areal dal festival ed avain vulì savair per tge che la glieud ch’èn qua sajan enconuschenta, tge che è lur spezialitad. Tar il proxim giast sin tribuna a Degen fiss quai cler: Bastian Baker. Cura ch’el po ir sin il palc, n’è anc betg cler.

  • 18:05

    Panna d’electricitad

    Enta Degen èsi per il mument vegnì ruassaivel – fin uss n’èsi anc betg clar daco che l’electricitad è crudada ora. Nus tegnain vus sin il current.

  • 17:48

    Blera glieud – blera consumaziun

    Bun 18’500 persunas chattan mintgamai la via enta Degen al festival. Blera glieud munta dentant era gronda said e gronda fom. Ord quest motiv hai sin l’entir areal diversas bars e stans da magliar.

    In gidanter che porta buots da gervosa.
    Legenda: Sin l'entir areal dovri blers gidanters e bleras gidantras. RTR, Dominic Pohle
audio
La davosa intervista cun las Liricas Analas
ord Actualitad dals 22.07.2022.
laschar ir. Durada: 7 minutas.

RTR

Artitgels legids il pli savens

Scrollar a sanestra Scrollar a dretga