EMF 2026 - Spurt final a Bienna

Sulegl, tschiel bunamain blau. Er son Pieder para d'avair buna luna e trametta intgins radis chauds a la festa federala da musica.

EMF26 – 17-05

Oz è l'ultim di da la festa ed en curt cumenzan gia puspè las concurrenzas. Dal Grischun è oz anc la Societad da musica Falera en gir. Las autras 13 formaziuns han terminà lur program ed èn per part gia puspè a chasa.

In punct culminant oz è la concurrenza tranter las societads en la categoria armonia, classa excellenta. Gia ier saira han la Société de musique La Gérinia Marly, il Corps de Musique La Landwehr Fribourg, la Stadtharmonie Zürich Oerlikon-Seebach, il Sinfonisches Blasorchester Bern (cun Rafael Camartin in dirigent rumantsch), la Stadtmusik St. Gallen ed il Symphonisches Blasorchester Kreuzlingen avert la concurrenza. Oz cuntinuescha quella cun il Blasorchester Stadtmusik Luzern, la Civica Filarmonica di Lugano, la Feldmusik Sarnen, La Concordia Fribourg ed il Blasorchester Siebnen. Igl è ina concurrenza da las meglras furmaziuns da musica instrumentala en Svizra. Ins po esser spannegià.

Intginas impressiuns dal marschar

Sin la concurrenza da marschar datti oz be anc in tschancun. A las 11:00 avra la Musikgesellschaft Aarwangen. L'ultima societad da musica che marscha è la Musikgesellschaft Haslen, ella parta tenor plan a las 16:57. L'entira concurrenza da marschar pudais vus er oz persequitar en il livestream.

Marschar da las musicas grischunas

Tut ils videos dal marschar chattais vus sin PlayRTR

La concurrenza da marschar

Avrir la box Serrar la box

Persequitar live la musica da parada!

Sonda, 16-05

Sonda è per usche da dir il di grischun a Bienna. Las bleras da las 14 furmaziuns dal chantun Grischun vegnan oz a Bienna a sa preschentar avant la giuria. L'emprima è stada la Musica Instrumentala Savognin e curt avant mezdi è er sa preschentada l'Uniun musicala Engiadina. Il suentermezdi suondan lura MG Madrisa Klosters Dorf, la Stadtmusik Chur, MG Alpenrösli Safien, lura las musicas da Trun, Jenaz e Domat.

EMF26 – 16-05

E danovamain datti fullas da glieud, probabel er perquai ch'i ha dà oz finalmain pli lungas fasas cun sulegl. Sin las vias datti bler pievel, quai che legra segiramain er ils numerus manaschis da mangiar per lung las vias sco er en la tenda principala sin la Place de l'Esplanade.

Resultats

Er il terz di da festa attira la concurrenza da marschar in massada glieud che giaudan betg mo ils marschs e las furmaziuns mabain er la bella e pacifica atmosfera da festa. Entant hai la saira era anc pluvì ina giada e pervi d'in urizi ha l'organisaziun schizunt rut giu la concurrenza e laschà liber a las societads da marschar. Quellas che marschan tuttina na vegnan betg giuditgadas e valetadas. E las musicas che marschan tuttina meretan grond respect per questa tenuta.

Las musicas grischunas

Producziuns e resultats da las 14 musicas grischunas chattais qua:

Venderdi, 15-05

Er oz è blera glieud vegnida a Bienna per tadlar e guardar las diversas societads da musica en acziun. Betg mo aderentas ed aderents da «lur» societad da musica mabain er per giudair l'atmosfera da festa. In'attracziun speziala a mintga festa è natiralmain er a Bienna la concurrenza da marschar. Per questa vala era oz: avair pazienzia e fortuna. L'aura resta variabla cun plievgia e vent. Il comité d'organisaziun ha perquai danovamain definì blocs da temps per uschia restar flexibels e decider a curta vista sche la concurrenza po avair lieu u betg. Ed er oz ha Son Peder manegià bain cun l'organisaziun. I ha strusch pluvì durant la concurrenza da marschar.

EMF26 – 15-05

En la sala da congress datti d'udir la categoria da musica da divertiment cun trais differents stgalims da grevezza, stgalim inferiur, mesaun ed aut. Ins pudess er numnar questa categoria la categoria libra nua che las furmaziuns preschentan in program da plirs tocs pli curts, dentant inclus in toc da pensum. En questa categoria, stgalim inferiurs, è er sa preschentada la Musica dals cadets da Cuira cun ses dirigent Gian Stecher. 16 musicantas e musicants inclus il dirigent han persvadì ed er suprendì tant publicum sco la giuria.

Resultats

Gievgia, 14-05

L'aura fa ed ha fatg in zic quitads a l'organisaziun. Perquai ch'i plova adina puspè ha il comité d'organisaziun decidì da metter la concurrenza da marschar en plirs blocs e da decider mintgamai in'ura ordavant sch'il bloc po vegnir realisà u betg. Fin questa saira han ina uschia pudì far tut ils blocs da marschar. Enturn las 19:00 hai però cumenzà a plover e per intginas musicas èsi da stà mal ch'els han gist en quest mument sunà. Ma els han tuts tegnì la dira e sunà sco sch'i fiss nagut, er cun bler sustegn dal publicum. Vus pudais persequitar la concurrenza da marschar er damaun sin il livestream da RTR. Pli tard datti lura era da vesair ils singuls videos da mintga societad da musica.

EMF26 – 13/14-5

Venderdi è l'aura probabel era grond tema. La prognosa n'è betg propi buna ma cun er far damaun tals blocs da marschar pon ins almain esser in zic flexibel e forsa tanschì uschia er il venderdi che bleras musicas pon marschar ed uschia delectar il publicum che guarda cun grond interess e plaschair las producziun sin las duas vias da marschar.

Oz avantmezdi han cumenzà en las totalmain 13 salas da concert las producziuns avant las giurias d'experts. En la sala da congress è en gir la categoria excellenta da las Brass Bands. Sco emprima furmaziun è la MG Risch-Rotkreuz sa preschentada. Ella vegn dirigida d'in Rumantsch: Roman Caprez. Per el è quai l'emprima giada ch'el dirigia ad ina festa federala ina furmaziun da la pli auta categoria.

Mesemna, 13-05

In di avant las concurrenzas da musica, la saira las 17:00, ha la festa cumenzà cun ina ceremonia d'avertura. Sper pleds festivs, per exempel da Nadja Günthör (presidenta dal CO) u Luana Menoud-Baldi (presidenta Uniun svizra da musica) hai dà era varsaquantas producziuns da musica. Sco punct culminant è vegnida surdada la bandiera da l'USM al CO dal EMF26. Questa saira datti anc in concert da gala dal Symphonisches Blasorchester des Schweizer Armeespiels. E per las societads da musica participantas cumenzan las concurrenzas gievgia avantmezdi.

Per la terza giada a Bienna

Per la terza giada en l'istorgia (suenter 1880 e 1976) po Bienna organisar ina festa federala da musica. Il 35avel inscunter naziunal da musica instrumentala vala sco ina da las pli impurtantas occurrenzas da la Svizra e tutga cun radund 22'000 musicantas e musicants tar las pli grondas festas da musica dal mund.

EMF26 – Eidgenössisches Musikfest 2026 in Biel

Avrir la box Serrar la box

Zum dritten Mal in ihrer Geschichte – nach 1880 und 1976 – darf Biel ein Eidgenössisches Musikfest durchführen. Das 35. Eidgenössische Musikfest für Blasmusik zählt zu den bedeutendsten musikalischen Grossanlässen der Schweiz und gehört mit rund 22’000 Musikerinnen und Musikern zu den grössten Blasmusikfesten weltweit. Das letzte Musikfest fand 2016 in Montreux statt; die ursprünglich für 2021 geplante Austragung musste pandemiebedingt abgesagt werden.

Während der Festtage rechnet Biel mit rund 100’000 Besucherinnen und Besuchern. Für einen reibungslosen Ablauf sind zahlreiche helfende Hände nötig: etwa 2’400 Freiwillige haben sich gemeldet, um mit ihrem Einsatz zum Gelingen des Anlasses beizutragen und ihn für alle Beteiligten in guter Erinnerung zu behalten.

Mit 550 angemeldeten Musikvereinen verzeichnet das Musikfest einen neuen Rekord. Die teilnehmenden Formationen treten in verschiedenen Kategorien und Stärkeklassen auf und stellen sich den Bewertungen der Jury.

Unter dem Festmotto «Musik verbindet» erwartet das Publikum neben den Wettbewerben ein vielfältiges Rahmenprogramm sowie ein grosses, lebendiges Stadtfest, das Biel während der Festtage ganz in den Zeichen der Musik stellt.

Bienna spetga radund 100'000 visitadras e visitaders durant ils dis da festa. Quai dovra er ina massa voluntaris, radund 2'400 persunas èn s'annunziadas per gidar e far buns servetschs per che la festa haja success e restia en buna memoria.

550 societads da musica (in nov record) èn s'annunziadas e sa preschentan en diversas categorias e classas da fermezza davant la giuria. Sut il motto da festa «musica collia» datti er in vast program accumpagnant sco er ina gronda festa da citad.

Musicas grischunas

Dal Grischun sa participeschan 14 societads da musica. L'Engiadina vegn represchentada d'ina musica da project. Il dirigent Reto Lehner ha mess en pe a posta per la festa federala la «Uniun Musicala Engiadina». Las bleras societads grischunas èn vidlonder la sonda. Suenter la rangaziun publitgain en questa tabella er ils resultats.

Tocs da pensum

A mintga festa federala da musica han las furmaziuns da preschentar davant ina giuria in toc da patg, che mintga musica po eleger sez ed in toc da pensum che la cumissiun da musica da l'Uniun svizra da musica tscherna. Ils tocs da pensum han las furmaziuns survegnì 10 emnas avant la festa. A Bienna han ellas da sunar las suandantas ovras:

Purschida da RTR e las autras unitads

Natiralmain che RTR na dastga betg mancar ad ina tala festa da musica. RTR filmescha l'entira concurrenza da marschar ed emetta quella sur quatter dis live en il livestream.

Il puls da Bienna curt avant la festa

L'entira SRG SSR rapporta da l'occurrenza ch'ha lieu mintga tschintg onns. Tranter auter datti in'emissiun naziunala «Potzmusig» cun il num «Bella musica» en las quatter linguas naziunalas. Vitiers datti diversas emissiuns communablas era sin las segundas chadainas da SRF, RTS e RSI.

Podcast Artg musical

L'Artg musical collia la diversitad musicala cun la profunditad schurnalistica. En mintga emissiun discutescha la redactura/ il redactur da RTR ensemen cun ils giasts davart musica da chors, brass, classica e temas actuals or da la scena da musica.

Ulteriurs audios e podcasts