Per la terza giada envida l'Uniun chanzun rumantscha a ses festival che celebrescha il chant e la chanzun rumantscha. Suenter Trun (1. festival il 2019) e Zuoz (2022) datti questa giada l'inscunter a Vella en Val Lumnezia.
Per questa ediziun han 21 cumponists e sis cumponistas inoltrà lur novas chanzuns per la concurrenza. Sper las categorias d'enfin uss: Chor d'uffants, chor maschadà e chor viril – datti da nov legraivlamain er ina categoria per chor da dunnas.
Program multifar
La concurrenza da novas chanzuns è il punct da program central dal festival. Avant e suenter datti dentant concerts cun bler chant per diversas furmaziuns. Il venderdi saira preschentan scolaras e scolars da la 5avla e 6avla classa da Castrisch, Duin, Glion, Lumnezia, Rueun e Ruschein otg chanzuns cun lur texts. L'enconuschenta band Silberbüx ha mess quests texts en musica. Pli tard il venderdi saira dattan Martina Linn e Mattiu concert en la halla plurivalenta a Vella. Sco «pre-bands» sunan duas formaziuns da giuvenils, ils Skyline Walkers e K!ss Me.
Sonda avantmezdi datti in chant avert per famiglias, il suentermezdi suonda lura la concurrenza da novas chanzuns che porscha quest onn gist duas innovaziuns. In chor ad hoc preschenta las novas chanzuns – tant questas per chor viril, chor maschadà e chor da dunnas. Ed il chor d'uffants da Sumvitg ensemen cun la scola da chant da la Scola da musica Surselva preschentan novas chanzuns per chor d'uffants.
RTR rapporta dal festival
Sco «amuse-buche» datti la dumengia, ils 28 da settember in Artg musical nua che la redactura Braida Janett discurra cun Duri Janett (dirigent Cor masdà Ftan) ed Andrea Schmed (dirigenta Chor mischedau Surrein) davart la muntada da las novas chanzuns per ils chors da la Rumantschia.
Per arrundar l'entira rapportaziun dal festival datti la dumengia ils 12 d'october (allas 09:00 uras) in Artg musical cun Clau Scherrer, il president da l'Uniun chanzun rumantscha ed il responsabel per la concurrenza da chanzuns, Giusep Giuanin Decurtins. Els discurran tranter auter la dumonda tge che capita uss cun tut quellas novas chanzuns.
Voting
La segunda innovaziun a Vella è il voting per tuttas e tuts. RTR fa in livestream da la concurrenza da chant sin rtr.ch e PlayRTR. Plinavant vegn la concurrenza er emessa direct en il radio RTR. Uschia pon er persunas che n'èn betg a Vella tadlar ed eleger lur chanzun favurita. Il voting po vegnir fatg sin l'entir mund. Uschia quintan ils responsabels cun ina gronda participaziun e bler dapli vuschs per las singulas chanzuns en concurrenza che fin qua nua che sulet il publicum preschent en la baselgia u en la halla ha pudì votar davart la pli bella u meglra chanzun.
Suenter il voting vegnan premiadas las chanzuns victuras da mintga categoria e surdads ils premis per las cumponistas ed ils cumponists victurs.
Las chanzuns victuras sco era tuttas chanzuns novas stattan a disposiziun a tuttas e tuts via la pagina da l'Uniun chanzun rumantscha. Là pon ins guardar las chanzuns e sch'ina dirigenta u in dirigent vul la chanzun per ses chor lura sto el u ella dumandar il dretg da la cumponista u dal cumponist. Fin uss èn mintgamai las novas chanzuns per il festival stadas a disposiziun fin il proxim festival. Uss vul l'uniun chanzun rumantscha publitgar e metter a disposiziun tuttas 132 chanzuns ch'i ha dà fin uss als trais festivals da la chanzun rumantscha.
La sonda saira envida lura la Musica giuvenila Surselva a concert. Ensemen cun il chantadur Dario Hess preschentan els arranschaments da sias chanzuns.
La dumengia stat lura la chanzun sacrala en il center dal festival. Iso Albin fa in referat da la «Consolaziun de l'olma devoziusa». Quest cudesch da chanzuns sacralas è stà en diever durant passa 250 onns en la liturgia catolica da la Surselva ed ha gì betg main che 12 ediziuns.
Il terz Festival da la chanzun rumantscha vegn arrundà cun in concert en la baselgia da Pleif/Vella. L’ensemble Schweizer Vokalconsort, dirigì da Marco Amherd, vegn ad interpretar melodias da la Consolaziun e preschentar ulteriuras ovras.
Resonanza
Sut quest titel ha la Fundaziun da cultura Lumnezia realisà in'exposiziun tematica deditgada al svilup dal chant rumantsch. Ella sa chatta en la Casa d'Angel a Lumbrein e porscha impressiuns auditivas, visualas e sensitivas da la multifara cultura musicala rumantscha. Persunas interessadas pon visitar l'exposiziun da gievgia fin dumengia mintgamai il suentermezdi. L'exposiziun è anc averta fin ils 10 da schaner 2026.