Dapi l'onn 2008 datti il Festival da Jazz a San Murezzan. Da lez temp ha Christian Jott Jenny fundà l'eveniment da musica, ch'el ha era manà durant ses temp d'uffizi sco president communal da San Murezzan (2019-2026).
Ina spezialitad dal festival è il palc principal che sa chatta en il «Dracula Club». Il club cun ina capacitad da be circa 180 persunas è cun quai in palc pitschen, congualà cun ils nums che dattan concerts. Ordaifer la stagiun da concerts è il club serrà per il public.
Tradiziun e novs formats
Sut il motto vesair, udir e sentir stars da jazz en in rom intim ha era quest onn lieu la 19avla ediziun dal Festival da Jazz San Murezzan. Gia il 2006 e 2007 ha il fundatur Christian Jott Jenny organisà serias da concerts, il 2008 è suandada la midada en il Dracula Club. Sur ils onns èn bleras ulteriuras localitads cumparidas en il program.
Il festival sa sviluppescha mintg'onn vinavant, uschia datti per exempel quest onn il format da «Hidden Session». Quella seria da concerts na cumpara betg sin il program regular, ma vegn mintgamai be publitgà a fitg curta vista. Uschia datti quasi concerts spontans e zuppads, sco ils organisaturs scrivan sur lur pagina.
Uschia in concert zuppà ha quai dà durant l'ultima emna. Annunzià be sin las medias socialas e per grond plaschair dals abitants e da las abitantas da la chasa da tgira Du Lac. Igl èn vegnids dus musicists da la Big Band da Pepe Lienhard a far in pitschen concert da jazz. Il pianist Christian Wegscheider vi dal clavazin ed Jörg Sandmeier vi dal saxofon.
Il concert haja plaschì als abitants e las abitantas, era sch'il jazz è stà insatge nunusità.
Quai ha rendì da vegnir giu da mia stanza a guardar quest concert.
Era sche Pepe Lienhard n'ha betg fatg part a quest concert, è el stà da la partida. El haja gia vesì bler en ses 80 onns. Da gronds palcs, concerts davant millis da persunas ma era uschè pitschnas, intimas preschentaziuns. Quellas plaschian a Pepe Lienhard il meglier, perquai che uschia possian ins vesair las emoziuns en las fatschas da l'auditori.
Promover dunnas en il jazz e chattar novs talents
Era la promoziun da talents giuvens è in aspect impurtant dal Festival da Jazz a San Murezzan. Il «Defender Pioneers‑Jazzlab» è ina concurrenza ch'ha lieu era quest onn per dar visibilitad e palc a persunas che vulan far in pass en la direcziun da la musica professiunala.
Plinavant datti dapi l'onn 2012 in format per promover dunnas en il mund da jazz. En il format «Woman in Jazz» dat il festival durant ina saira da concert il palc mo a dunnas. I dettia anc adina bler damain dunnas en il jazz, e quel format provia da dar dapli visibilitad a dunnas, uschia ils organisaturs.